भांगरभूंय | प्रतिनिधी
पेडणें, प्रतिनिधी : पर्यटन हंगाम सुरू जालो काय जायते देशी- विदेशी पर्यटक तशेंच थळावे नागरीक दुचाकी वा चार चाकी वाहनां नंबर प्लेट नासतनाय चलयतना दिसतात. ह्या वाहनांचेर येरादारी खातें, वाहतूक पुलीस कसली कारवाय करतात काय?
पेडणें म्हालांतल्या दर्यादेग वाठारांत अशे तरेचीं व्हडा प्रमाणांत देशी विदेशी पर्यटक तशेंच थळावेय नागरीक नंबर प्लेट नाशिल्लीं वाहनां घेवन बिनधास्त चलयतना दिसतात. केन्ना केन्नाय असल्या वाहनांचो अपघात जाता. अपघाता उपरांत हें वाहन घेवन चालक थंयच्यान पळून वतात. तेन्ना असलीं वाहनां सोदपाक बर्योच आडखळी मुखार येतात. ताका लागून येरादारी पुलीस, खात्यान रस्त्यार जीं नंबर प्लेट नाशिल्लीं वहनां भोंवतात तांचेर कारवाय करपाची गरज आसा.
पर्यटन हंगाम सुरू जाले उपरांत येरादारी पुलीस वा येरादारी खात्याचे अधिकारी गाडयो घेवन रस्त्यांच्या धोको निर्माण करपी जंक्शनां कडेन रावतात. एखादी दुचाकी, चारचाकी येरादारी नेम मोडून गाडी चलयतात तांचेर पुलीस कारवाय करपाचो यत्न करतात. मात कांय जाण नंबर प्लेट नासतनाय गाडयो चलयतात. तांचेर कोण करवाय करतले? असो प्रस्न सध्या उप्रासतना दिसता.
तांचो सोद येरादारी पुलिसांनी घेवपाची गरज आसा. केन्ना केन्ना असलीं वाहनां अपघात करून थंयच्यान पळ काडटात. ताका लागून असल्या वाहनांचो बेकायदेशीर वेव्हारांत आसपाव आसता काय? असो दुबाव नागरीक उक्तायतात.
मजगतीं, विदेशी पर्यटक सध्या खाजगी वाहनां घेवन वेगान पळ काडटनाचें चित्र दिसून येता. पर्यटकांक भाड्यान घेतात त्या गाडयांक पर्यटन खात्याचे परवाने वा येरादारी खात्याचे नेम लागतात. ते नेम पाळिनासतना कांय खाजगी गाडयो विदेशी पर्यटकांक भाड्याक दिवपाची पद्धत सुरू जाल्या. ताका लागून जीं पर्यटन खात्या कडेन संबंदीत आशिल्लीं वाहनां आसतात, त्या गाडयेकारांक लुकसाण सोंसचें पडटा. जाका लागून रेंट बायक वा पर्यटक गाडयांक भाडें मेळनाशिल्ल्यान ते रस्त्या कुशीक बसून केन्नां गिरायक मेळटलें हाची वाट पळयतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
