भांगरभूंय | प्रतिनिधी
पणजीः केंद्र सरकाराच्या समग्र शिक्षा अभियाना खाला गोंयांत वावुरपी ब्लॉक तशेंच क्लस्टर सिरोर्स पर्सन म्हूण काम करपी कर्मचाऱ्यांक नोकरेंत दोम वर्सां वाड दिवपाचो निर्णय सरकार बेगिनूच घेतलें. ताका लागून ह्या कर्मचाऱ्यांक पिरायेच्या 62 व्या वर्सा मेरेन नोकरी करपाक मेळटली, अशी म्हायती सरकारी सुत्रांनी शेनवारा ‘भांगरभूंय’ कडेन उलयतना दिली.
समग्र शिक्षा अभियाना खाला काम करपी सुमार 185 कर्मचाऱ्यांनी वेतन वाडी सयत निवृत्ती वेतन सुरू करपाची मागणी गोंय सरकारा कडेन केल्ली. ते विशीं हालींच तांणी मुख्यमंत्री डॉ. प्रमोद सावंत हांची भेट घेतिल्ली. समग्र शिक्षा अभियान ही केंद्र सरकाराची येवजण आशिल्ल्यान संबंदीत कर्मचाऱ्यांक निवृत्ती वेतन दिवपाक मेळना. ताच्या बदल्यात तांची निवृत्तीची पिराय 60 वयल्यान 62 वर्सां करपाचो प्रस्ताव मुख्यमंत्र्यान तांचे मुखार दवरला, अशें सुत्रांनी सांगलें.
समग्र शिक्षा अभियाना खाला काम करपी ह्या कर्मचाऱ्यांक सुरवेक उणें वेतन मेळटालें. मुख्यमंत्री डॉ. सावंत हांणी 2022 त तांच्या वेतनांत घसघशीत वाड केल्ली. ते प्रमाण नव्यान रुजू जावप्यांक 25 हजार, नोकरेंत पांच वर्सां पुराय केल्ल्यांक 30 हजार आनी 10 वर्सां पुराय केल्ल्यांक म्हयन्याक 35 हजार रुपया वेतन दितात, अशीय म्हायती सुत्रांनी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
