भांगरभूंय | प्रतिनिधी
मुख्यमंत्र्यान बसकेंत केली शिश्टाय, आयच्यान काम सुरू
भांगरभूंय । प्रतिनिधी
सांखळीः दुदसागर घसघशा संबंदांत निर्माण जाल्लो प्रस्न मुख्यमंत्री डॉ. प्रमोद सावंत हांचे शिश्टाये उपरांत सुटलो. सांखळी रवीन्द्र भवनांत दुदसागर जीप ऑपरेटर्स असोसिएशन आनी मुख्यमंत्री हांचे मदीं जाल्ले बसकेंत मुख्यमंत्र्यान सगळो विशय समजून घेवन विवीध पर्याय असोसिएशना मुखार दवरले. तातूंत जीटीडीसीचो कावंटर उरतलो, ऑनलायन बुकींग लेगीत चालूच उरतलें, पयशे उणें करपाचे मागणे वयल्यान 200 रुपया उणे केल्यात. तशेंच ह्यो सगळ्यो गजाली जाग्यार घालपा खातीर एका म्हयन्याचो वेळ दिला. ह्या उपायाचेर जीप ऑपरेटर्स असोसिएशना तयार जालें आनी आयच्यान काम सुरू करतले, अशें असोसिएशनाचे अध्यक्ष निलेश वेळीप आनी सचीव नंदेश देसाय हांणी सांगलें.
जीप असोसिएशनाच्या सगळ्या पदाधिकाऱ्यांची आनी वांगड्यांची कागदपत्रां तयार करपाची प्रक्रिया करून घेतले उपरांत तांकां विस्वासांत घेवन सर्वीस प्रोव्हायडर घालतले. तशेंच गोंय रान उदरगत म्हामंडळ, पर्यटन उदरगत म्हामंडळ आनी असोसिएशन हांचे मदीं कबलात करतले. ते उपरांत ही सेवा सुरळीत जातली. ह्या विशयाचेर आतां उपाय काडपाचें आस्वासन स्वता असोसिएशनान दिला. बसकेंत चर्चेक आयिल्ल्या विशयां प्रमाण सेवा चलतली, अशें ह्या वेळार मुख्यमंत्री डॉ. सावंत हांणी सांगलें.
ह्या वेळार असोसिएशनाचे अध्यक्ष निलेश वेळीप हांणी सांगलें, मुख्यमंत्र्यांचेर आनी आमदारांचेर विस्वास दवरून सगळ्यांक सांगून चर्चा केले उपरांत एक म्हयनो दिला. ह्या एका म्हन्यांत सगळे सुरळीत करतले. जीटीडीसीचो कावंटर तसोच उरतलो. जीटीडीसी, जीएफडीसी आनी असोसिएशन हांचे मदीं संयुक्त कबलात करतले.
ह्या विशयाचेर असोसिएशनान दोन दिसांचें सांखळी उपोशण जाहीर केल्लें. ताचो एक दीस जाला. फाल्यां (3 नोव्हेंबर) सकाळीं 8 वरांचेर आमी सगळे जमतले आनी थंय जमिल्ल्या लोकांक हो संदेश दिवन बसकेंत जाल्लो उपाय सांगतले. उपोशणा विशीं आपूण एकटो निर्णय घेवपाक शकना. सगळ्यां मुखार हो विशय मांडटले आनी मुख्यमंत्र्यांचेर विस्वास दवरुनूच फुडलो निर्णय घेतले, अशें वेळीप हांणी सांगलें.
हे बसकेक दुदसागर जीप ऑपरेटर्स असोसिएशनाचे अध्यक्ष निलेश वेळीप, धारबांदोडें सरपंच विनायक गांवस, भाजप मंडळ अध्यक्ष विलास देसाय, मंडळ सचीव मच्छिंद्र देसाय, सचीव नंदेश नायक देसाय, मयुर मराठे उपाध्यक्ष, भांडारी कौशिक खांडेपारकार, दिलीप मायरेकार, ट्रिबोलो सौझा, ब्रिजेश भगत, बेनी आजावेदो, जॉन फर्नांडीस हाजीर आशिल्ले. सचीव नंदेश देसाय हांणी सांगलें, मुख्यमंत्र्यान बसकेंत केल्ले चर्चे उपरांत तांणी सुचयल्ल्या मुद्द्यांचेर आमी फुडें वतले. तांचेर आमचो विस्वास आसा. लोकांक आतां आमी वचून सांगतले आनी हो उपाय मानून घेवचो अशे विनयतले. फाल्यांच्यान काम सुरू करून फुडल्या एका म्हयन्या उपरांत परतून मुख्यमंत्र्यांक मेळटले आनी सगळे 431 जीप ऑपरेटर्साच्या कल्याणा खातीर मुख्यमंत्र्यांच्या मार्गदर्शना प्रमाण काम करतले, अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
