जिपी धांवल्यो दुदसागराचेर

भांगरभूंय | प्रतिनिधी

फोंडें: कुळेचें जागृत देवस्थान म्हूण वळख आशिल्ल्या दुदसागर आजोबाक गाराणें घालून लेगीत कांय जीप धनी जबरदस्तीन पर्यटकांक घेवन दुदसागर घसघशाचेर गेले. ताका लागून वाठारांत तणाव निर्माण जालो. वाठारांत व्हड प्रमाणार पुलीस बंदोबस्त दवरून कांय मेजकेच्योच जिपी सोडिल्ल्यान तिडकल्ल्या लोकांनी जिपी आडायल्यो. तणावाची स्थिती निर्माण जाल्ल्यान आदले खासदार विनय तेंडुलकार आनी सांवड्डें भाजप मंडळाचे अध्यक्ष विलास देसाय हांणी घडणुकेचे सुवातेर धांव घेतली. तेंडुलकार हांणी मुख्यमंत्री डॉ. प्रमोद सावंत हांचे कडेन चर्चा केले उपरांत ऑफ लायन जिपी सोडपाचो आदेश मुख्यमंत्र्यान दिलो. हाचेर उपाय काडचे खातीर मुख्यमंत्र्यान परतून बसका आपयल्या. ताका लागून स्थिती नियंत्रणांत येवन ऑफ लायन जिपी दुदसागर घसधशाचेर सोडल्यो.

मागणी पुराय जावंक नाशिल्ल्यान दुदसागर टूर ऑपरेटर संघटणे वतीन शेनवारा सावन सांखळी उपोशण सुरू करपाची शिटकावणी दिल्ली. पूण शुक्रारा एका गटान कांय जीप धनयांचेर वेवसाय सुरू करपा खातीर चेपण हाडिल्लें. जीप धनयांच्या सरकारी नोकरेंत आशिल्ल्या कांय सोयऱ्यांचो बदल्यो तशेंच कांय जाणांक सरकारी नोकरी दिवपाचें आस्वासन दिलें. ताका लागून कांय मेजकेच जीप धनी पुलीस बंदोबस्तांत गाडयो सोडपाक तयार जाले. सकाळीं वाठारांत खर पुलीस बंदोबस्त दवरिल्लो. धारबांदोडें म्हालाचे उपजिल्होधिकारी निलेश धायगोडकार, फोंडें पुलीस स्टेशनाचे उपअधिक्षक शिवराम वायंगणकार, कुळेचे निरिक्षक राघोबा कामत, फोंडेंचे निरिक्षक विजयनाथ कवळेंकार, म्हाड्डोळचे निरिक्षक योगेश सावंत आनी हेर पुलीस कर्मचारी व्हड संख्येन वाठारांत हाजीर राविल्ले.

दुदसागर टूर ऑपरेटर संघटणे वतीन सगळ्यांत पयलीं दुदसागर आजोबाक आनी खुरसाक गाराणें घालून सांखळी उपोशणाक सुरवात केली. त्या वेळार खर पुलीस बंदोबस्तांत उपजिल्होधिकारी निलेश धायगोडकार हांणी पर्यटकांक घेवन गाडयो सोडपाचो यत्न केलो. सुमार 5 जिपी घसघशाचेर गेले उपरांत तिडकल्या जीप धनयांनी पर्यटकांक घेवन वचपी जिपी आडायल्यो. ताका लागून वाठारांत तणावाची स्थिती निर्माण जाली.

ह्या वेळार उपजिल्होधिकारी निलेश धायगोडकार आनी उपअधिक्षक शिवराम वायंगणकार हांणी जीप धनयांची समजूत काडपाचो यत्न केलो. त्या वेळार विनय तेंडुलकार आनी विलास देसाय हांणी जीप धनयांची भेट घेवन चर्चा केली. त्या वेळार विनय तेंडुलकार हांणी मुख्यमंत्र्यां कडेन फोना वयल्यान चर्चा केली. त्या वेळार मुख्यमंत्र्यान हाचेर उपाय काडपा खातीर सांजे वेळार बसका आपयल्या, तशेंच ऑफ लायन जिपी घसघशाचेर सोडपाचो आदेश दिलो. ताका लागून तेंडुलकार हांणी जिपी ऑफ लायन सोडपाक सुरवात केली. दुदसागर टूर ऑपरेटर संघटणेचे अध्यक्ष निलेश वेळीप हांणी सांगलें, संघटणेंत फूट घालपाचो यत्न जाला. ताका लागून कांय जीप धनयांनी चेंपणा खाला येवन मोसम सुरू करपाचो यत्न केलो. जे मेरेन योग्य उपाय येना ते मेरेन सांखळी उपोशण चालूच दवरतले. उपाय आयलो ना जाल्यार खर आंदोलन सुरू करतले, अशें तांणी सांगलें.