दुदसागर टूर कावंटर प्रकरणः आयज सांजवेळार मुख्यमंत्र्या वांगडा जातली बसका

भांगरभूंय | प्रतिनिधी

फोंडें, प्रतिनिधी ः दुदसागर टूर कावंटराचो विशयाचेर जायत्यो बसका जाल्यो तरी लेगीत तो सुटावो जावपाचे नांव घेना. काल शुक्रारा मुख्यमंत्र्या बरोबर परत एक फावट बसका जाली तरी लेगीत ह्या बसकेंत कांयच निर्णय जावंक ना.
जीप धनयांनी शेनवारा सकाळीं सावन कुळ्यां बाजारांत साखळी उपोशण सुरू केले. गोंय पर्यटन विकास म्हामंडळान सुरू केल्लो कावंटर बंद करिना तो मेरेन हंगाम सुरू करचे ना ह्या निर्णयाचेर तें ठाम आसात. प्रसंग पळोवन वाठारांत पुलिसांचो खर बंदोबस्त दवरला. मजगतीं, उपजिल्होधिकारी निलेश धायगोडकर घडणुक सुवातेर आयिल्ले.
गोंय पर्यटन विकास म्हामंडळान कुळें सुरु केल्ले कावंटर बंद करपाची मागणी पुराय जावंक नाशिल्ल्यान दूदसागर टूर ऑपरेटर्स असोसिएशनाच्या जीप धनयांनी दूदसागर आजोबा आनी लागसारच्या खुरसाक गाराणे घालून साखळी उपोशणाक सुरवात केली. मजगतीं, कांय जीप धनयांनी पुलीस सुरक्षे खाला पर्यटकांक दुदसागर घसघशार व्हेले. कांय जीप धनयांनी जबरदस्तीन हंगाम सुरू करपाचो यत्न केल्ल्यान वाठारांत तणाव वाडलो. ह्या वेळार कितेंय चुकीचे घडले जाल्यार ताका फकत सरकार जापसालदार आसतलो अशें संघटनेचे अध्यक्ष निलेश वेळीप हांणी सांगलें. कांय वेळा उपरांत थळाव्या बायलांनी पर्यटकांक व्हरपी जीप आडायली आनी तणावाची परिस्थिती निर्माण जाली.
मजगतीं, आदले खासदार विनय तेंडुलकार घडणुक सुवातेर पवलें तांणी मुख्यमंत्री डॉ. प्रमोद सावंत हांचे कडेन फोनाचेर हें संबंदी चर्चा केली. ते वेळार पर्यटकांक व्हरपी जीपी आयज पुराय दीस ऑनलायन नोंदणी करिनासतना सोडपाचो आदेश मुख्यमंत्र्यान दिलो. तशेंच दुदसागर जीप धनयांचो प्रस्न सुटावो करपा खातीर आयज सांजवेळार मुख्यमंत्री डॉ. प्रमोद सावंत हांचे वांगडा म्हत्वाची बसका जातली अशें आदले खासदार विनय तेंडुलकार हांणी सांगलें.