भांगरभूंय | प्रतिनिधी
युक्रेना आड झुजांत रशियेक मजत केल्ल्याचो भारता सयत संवसारांतल्या 398 कंपनींचेर आरोप
वॉशिंग्टन, खबरां संस्था ः अमेरिकेन 19 भारतीय कंपनीं सयत रशिया, चीन, मलेशिया, थायलंड, तुर्की, संयुक्त अरब अमीरात आदीं एक डझना परस चड देशांतल्या 398 कंपनींचेर निर्बंध घाल्यात. फेब्रुवारी 2022 वर्सा युक्रेनाचेर आक्रमण जाले उपरांत ह्या कंपनींनी रशियेक उपकरणां उपलब्ध करुन दिल्यांत आनी युक्रेना आड झुजांत रशिया तांचो वापर करता असो आरोप अमेरिकेन केला. हातूंतल्यो चडशो कंपनी इलॅक्ट्रॉनीक उपकरणां पुरवण करपी आसात.
परराष्ट्र, ट्रेझरी आनी वाणिज्य खात्यान हे निर्बंध घाल्यात अशें अमेरिकेन सांगलें. तशेंच परराष्ट्र विभागान रशियन संरक्षण मंत्रालयाच्या जायत्या वरिश्ठ अधिकाऱ्यांचेर आनी संरक्षण कंपनींचेर राजनैतिक निर्बंध घाल्या.
ह्या भारतीय कंपनींचो आस्पाव…
ॲसेंड एव्हिएशन इंडिया प्रा.लि., मास्क ट्रान्स, टीएसएमडी ग्लोबल प्रा.लि., फुट्रेव्हो, अबहार टेक्नोलॉजीज अँड सर्विसेस प्रा.लि., डेनव्हास सर्विसेस प्रा.लि., ईएमएसवाय टेक, गॅलेक्सी बिअरिंग्स लि., इनोव्हियो व्हेंचर्स, केडीजी इंजीनिअरिंग प्रा.लि., खुशबू ऑनिंग प्रा.लि., लोकेश मशीन्स लि., ऑर्बिट फिनट्रेड एलएलपी, पॉयंटर इलेक्ट्रॉनिक्स, आरआरजी इंजीनिअरिंग टेक्नोलॉजीज प्रा.लि., शार्पलायन ऑटोमेशन प्रा.लि., शौर्य एअरोनॉटिक्स प्रा. लि., श्रीजी इम्पेक्स प्रा.लि., श्रेया लायफ सासंसेस प्रा.लि.
मार्च 2023 ते मार्च 2024 ह्या काळांत अॅसेंड एव्हिएशन कंपनीन रशियन कंपनींक 700 परस चड म्हाल धाडल्याचो आरोप आसा. जून 2023 ते एप्रिल 2024 ह्या काळांत मास्क ट्रान्स कंपनीन सुमार 2.5 कोटी रुपयांचो म्हाल धाडलो. ताचो वापर रशियेन एव्हिएशनशी संबंदीत कामांत केलो. टीएसएमडी ग्लोबल कंपनीन रशियन कंपनींक 3.6 कोटी रुपयां परस चड मोलाचे इलॅक्ट्रॉनीक इंटीग्रेटेड सर्किट, सेंट्रल प्रोसेसिंग युनिट आनी कॅपेसिटर धाडल्यात असो आरोप आसा.
दोन भारतीयांचीं काळ्या वळेरेंत नांवां…
अमेरिकेन 2 भारतीयांचेरय निर्बंध घाल्यात. तातूंत विवेक कुमार मिश्रा आनी सुधीर कुमार हांचो आस्पाव आसा. दोनूय अॅसेंड एव्हिएशनाचे आसात. दिल्लींतली ही कंपनी विमान उद्देगाक सुटे भाग आनी वंगण पुरवण करता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
