भांगरभूंय | प्रतिनिधी
पणजीः करपाक गेले गणपती, जालो मारुती अशी गत ताळगांवच्या रस्त्याची जावन रावल्या. रस्तो हॉटमिक्स करून चकचकीत केला. पूण नव्यान हॉटमिक्स केल्ल्या रस्त्या मदींच एक बुराक पडला. ह्या बुरकाचो अदमास येनाशिल्ल्यान हांगासर अपघात जावपाची भिरांत आसा.
ताळगांव सावन ओशेल दर्यादेगेर वचपी रस्त्यार ताळगांवां चडटेचेर रस्त्यांचें रुंदीकरण करून हॉटमिक्सिंग केल्ले. हे काम करचे वेळार कुशीचे पायपा खांबे आशिल्ले ते कुशीक काडिल्ले. पूण हे सुवातेर शिमीटाचो पायप आसलो. ह्या पायपाचो वयलो भाग काडलो पुण तो पुरुंक ना. हे पायप आतां तोंड वयर काडून रावल्यात. हे पायप पुरपाक विसरले काय वा म्हजें काम न्हय म्हण मुद्दाम आडनदर केल्या हो व्हडलो प्रस्न आसा.
हो बुराक रस्त्याचे मदीच आशिल्ल्यान दुचाकी चलोवप्यांक ताचो अदमास येवप कठीण. तशेंच रातच्या वेळार हो बुराक दिश्टी पडप शक्य ना. देखून ह्या बुरकाक लागून दुचाकी चलोवप्यांचे जीव घाताक येवपाक शकता. रस्तो चकचकीत, पूण एका बुरकान बऱ्या रस्त्याचें नांव पेड्ड्यार केले अशे जावपाक शकना. भौशीक बांदकाम खात्यान हाचेर लक्ष घालपाची गरज आसा.
हे विशीं उलयतना थळावी सामाजीक वावुरपी सेसील रॉड्रिग्स हांणी सांगलें, विद्यापीठ जंक्शना लागसार ताळगांव ते ओशेल वचपी रस्त्या वयल्या गंभीर गजालीचेर भौशीक बांदकाम खात्यान आडनदर केल्या.
हे सुवातेर धारीची कांठां आशिल्लो मोडको शिमिटाचो पायप रस्त्यार तोंड वयर काडून रावला. हो पायप रस्त्या भितर खोल पुरिल्ल्यो आशिल्ल्यान हो जीवघेणो जावन आसा. ह्या पायपाक लागून गाडयेचे टाय पंक्चर जावन अपघात जावपाची शक्यता आसा, तशेंच दुचाकी चालकांच्या जिविताक धोको आसा, अशें सेसील हांणी सांगलें.
हो रस्तो हाल्लीच हॉटमिक्स करून लेगीत ह्या गजाली कडेन अभियंतानी दुर्लक्ष केल्या. लोकांचे सुरक्षेक लागून भौशीक बांदकाम खात्यान बेगिनांत बेगीन कारवाय करून हो पायप काडचो आनी रस्त्याचेर लोकांचे सुरक्षेच्या नदरेन पावल उखलचे, अशी मागणी सेसील हांणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
