भांगरभूंय | प्रतिनिधी
– ‘एनबीसीसी’ उबारतली, हेर जाग्यांचेर हाडटले व्हड प्रकल्पपणजीः पर्वरे उबारपाची 15 माळ्यांची ‘प्रशासकीय खांब’ ही इमारत केंद्र सरकाराच्या राष्ट्रीय इमारत बांदकाम म्हामंडळा वरवी बांदतले अशी म्हायती सरकारी सुत्रां कडल्यान मेळ्ळ्या. हे इमारती वांगडाच ‘एनबीसीसी’ गोंयांत कोट्यांनी रुपयांचे प्रकल्प उबारतले अशेंय सूत्रांनी सांगलां.
एनबीसीसी घरां आनी शारी वेव्हार मंत्रालयांतल्यान भौशीक क्षेत्रांतले वेगवेगळे उपक्रम हातांत घेता. राज्य सरकार बेगीनूच हे कंपनी कडेन समजिकाय कबलात करतले. उपरांत ही कंपनी गोंयांतल्या वेगवेगळ्या वाठारांनी व्हड प्रकल्प उबारतली. एनबीसीसी राज्यांतली सगळ्यांत व्हडली नियोजीत ‘प्रशासकीय खांब’ इमारत बांदपाची आसा, आनी हेर वाठारांनी राज्य सरकारा कडल्यान मेळिल्ल्या सरकारी जाग्यारय कंपनी हो प्रकल्प बांदपाची आसा. जुंता हावस सारक्या कांय व्हड सरकारी इमारतींचें दुरुस्तीचें कामूय कंपनी हातांत घेतली अशें सूत्रांनी सांगलें.
एनबीसीसी कडेन कबलात केले उपरांत राज्य सरकार प्रकल्पां खातीर कंपनीक सरकारी जमीन दितलें. ह्या जमनीचेर व्हड व्हड इमारती उबारतले आनी कांय इमारती कंपनी सरकाराक दितली. म्हणल्यार उरिल्ल्यो इमारती कंपनी विकतली. हाचे भायर सद्याच्यो कांय सरकारी इमारती दुरुस्त करून थंय गरजेच्यो सुविधा उबारून कंपनी सरकाराक कांय माळे दितली. हेर माळे विकतले असोय उल्लेख सूत्रांनी केलाे.
…………………………..
– राज्यांतलीं सगळीं सरकारी कार्यालयां एकाच पांख्या खाला हाडपा खातीर सरकारान फाटल्या वर्सा हेलीपॅड, रेस्टोरण्ट आशिल्लो 360 डिग्री टॉवराचो आस्पाव आशिल्लो 15 माळ्यांचो ‘प्रशासन खांब’ उबारपाचो निर्णय घेतिल्लो. हे इमारतीचो खर्च सुमार 300 कोटी खर्च अपेक्षीत आशिल्लो.
– सुरवातीक ही इमारत पाटो-पणजींत संग्रहालय आशिल्ल्या सुवातेर, सुमार 9 हजार चौखण मिटर वाठारांत बांदपाची येवजण आशिल्ली. पूण, उपरांत ही इमारत पर्वरे बांदपाचें थारायलें.
– राज्य साधन सुविधा विकास म्हामंडळान फाटल्या कांय म्हयन्यां सावन ही इमारत बांदपा खातीर प्रशासकीय प्रक्रिया सुरू केल्ली. पूण, आतां हे इमारतीचें काम राज्य सरकारा कडल्यान ‘एनबीसीसी’ कडेन दिवपाचें थारायलां अशें सूत्रांनीय स्पश्ट केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
