भांगरभूंय | प्रतिनिधी
सत्तरी म्हालांत पावसाक लागून खूबशे कडेन पडझड
वाळपय: सत्तरी म्हालांत फाटल्या 24 वरांत पडिल्ल्या पावसाक लागून खूबशा घरांचें लुकसाण जालें. खूबशे कडेन रस्त्यार पडिल्ल्या झाडांक लागून येरादारी ठप्प जावपाचे प्रकार घडले. वाळपय उजो पालोवपी दळाच्या जवानांनी दीस-रात काम करून रस्त्या वेलीं पडिल्लीं झाडां कुशीक काडलीं. वेळूस हांगा घराचेर झाड पडून घराचें लुकसाण जालें.
उजो पालोवपी दळाच्या जवानां कडल्यान मेळिल्ले म्हायती प्रमाण वेळूस सुंदरवाड्यार राधिका परवार हांच्या घराचेर झाड पडून घराचें व्हड प्रमाणांत लुकसाण जालें. हें झाड घराच्या पाख्यार पडलें. हाका लागून पाख्याचें लुकसाण जालें. तेच प्रमाण पाख्याचो भाग घरांत कोसळिल्ल्यान घरांतल्या सामानाचेंय व्हड प्रमाणांत लुकसाण जालें. हाका लागून ह्या कुटुंबाक लुकसाणेचो फटको बसला. सरकारान ह्या कुटुंबाक मजत करची अशी मागणी लोकां कडल्यान जायत आसा.
उजो पालोवपी दळाचे जवान कृष्णा नायक, अविनाश गांवकार हांणी ह्या घराचेर पडिल्लें झाड कुशीक काडपा खातीर म्हत्वाची कामगिरी केली.
आंबेडे नगरगांवां मारुती देवळाच्या शेजरा आशिल्ल्या सुभाष गांवकार हांचे शेडीर झाड पडून धा हजारांचें लुकसाण जालें. उजो पालोवपी दळाच्या जवानांनी 30 हजार रुपयांची मालमत्ता वाटावपाक येस मेळयलें.
वाळपय हातवाड्यार एका शेडीर झाड पडून सुमार 20 हजार रुपयांचें लुकसाण जालें. जाल्यार 50 हजार रुपयांची मालमत्ता वाटावपाक येस आयलें. वेळूस हांगा हळदणकार हांच्या गुदांवाचेर झाड पडून पांच हजार रुपयांचें लुकसाण जालें जाल्यार 20 हजार रुपयांची मालमत्ता वाटावपाक येस आयलें.
तेच प्रमाण खूबशे कडेन रस्त्यार पडिल्ल्या झाडांक लागून येरादारीचेर परिणाम जालो. हातूंत मासोड्डें हांगासरल्या गणपती विसर्जन थळार झाड पडून रस्तो येरादारी खातीर बंद जालो. तेच प्रमाण वाळपय दूरध्वनी केंद्राच्या इमारतीच्या मदीं झाड पडलें. अशे तरेन विवीध कडेन झाडां पडिल्ल्यान येरादारीचेर परिणाम जालो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
