भांगरभूंय | प्रतिनिधी
फाटोफाट जायत्यो बसका जावन लेगीत निर्णय ना
पणजी, प्रतिनिधी : दुदसागर टूर कांवटराचो विशय अजून कोफुसावांतच आसा. जायत्यो बसका जाल्यो तरी लेगीत हो विशय सुटावो जावपाचे नांव घेना. शुक्रारा मुख्यमंत्र्या बरोबर परत एक फावट बसका जाली तरी लेगीत कांय निर्णय जावंक ना. आता परत दुदसागर टूर ऑपरेटर संघटना आनी थळावे आमदार, गोंय पर्यटन उदरगत म्हामंडळाचे (जीटीडीसी) अध्यक्ष गणेश गांवकार हांचे मदीं बसका आसा. तेन्ना तरी हो विशय एकदाचो तडीक लागतलो अशी आस्त आसा.
शुक्रारा सकाळीं गणेश गांवकार, आदले आमदार दीपक पावसकार, आदले खासदार विनय तेंडुलकार, सावड्डें भाजप मंडळ अध्यक्ष निलेश देसाय आनी हेर भाजपाचे पदाधिकारी हाजीर आशिल्ले. बसका जाले उपरांत हे विशयाचेर उलोवपाक गणेश गांवकार हांणी उलोवप टाळ्ळें.
आमी मुख्यमंत्र्याक दिवाळेंची परबीं भेटोवपाक आयिल्ले आनी विशय म्हणटा तो कसलोच नासलो. दुदसागरा संबंदी ऑपरेटरां कडेन हांवें आनी सरपंचान उलोवणी केल्या. सगलें सारकें जातलें. बेगीनूच हो विशय सुटावो जातलो, अशें गांवकार हांणी सांगलें.
बसके उपरांत दीपक पावसकार हांणी सांगले, फुडलीं बसका दुदसागर टूर ऑपरेटरां वांगडा जावन 24 वरां भितर हो विशय सुटावो जातलो.
मुख्यमंत्र्यान सांगलां हो विशय सोडोवपाक ते इत्सूक आसात आनी थळावे आमदार हो विशय सोडयतले. हो कांवटर काडप कांय ना हें सगळें आमदार थारयतले. आतां 24 वरां भितर दुदसागर कांवटरा कडेन दुसरी बसका जातली. थंय संघटना आनी थळावे आमदार एकामेकां बरोबर चर्चा करून हो विशय सोडयतले, अशी म्हायती पावसकार हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
