भांगरभूंय | प्रतिनिधी
दुबावीत टॅक्सी ड्रायव्हराक अटक, दुसऱ्याचो सोद सुरु
म्हापशें, प्रतिनिधी ः कळंगुटे मोटार कुशीक काडपाच्या कारणावेल्यान दोन थळाव्या टॅक्सी ड्रायव्हरांनी पुण्यांतल्या शेख ह्या पर्यटक कुटुंबाक मारपेट केली. पुलिसांनी दुबावीत पीटर फिलीप नोरोन्हा (कळंगुटे) हाका अटक केल्या. जाल्यार दुसरो दुबावीत सांपडूंक ना.
ही घडणूक बिरेस्तारा 31 तारखेर रातच्या 9.10 वरांचेर घडली. कागाळदार नाजिया शेख हांचें पांच जाणांचें कुटुंब दिवाळेची सुटी मनोवपाक गोंयांत आयिल्लें. घडणुकेच्या वेळार तांणी आपली गाडी कळंगूटे सेंट अॅन्थनी चॅपेला लागसार पार्किंगांत पार्क केल्ली. ह्या वेळार दुबावितांनी गाडी कुशीक काडपाच्या कारणा वेल्यान तांचे कडेन वाद घालो आनी तांकां गाळी संवल्यो. ताचे वयल्यान तांचे मदीं झगडीं जालीं. दुबावितांनी कागाळदाराच्या घोवाक आनी कुटुंबांतल्या हेर वांगड्यांक मारपेट केली.
हे संबंदी कागाळदारांनी पुलिशेंत कागाळ दाखल केली. दुबावितांच्या गाडयेचो क्रमांकय नोंद केल्लो. पुलिसांनी ताचे मजतीन गाडयेच्या धनयाचो फोन नंबर मेळयलो आनी दुबावितांच्या घराचेर नदर दवरली. दुबावीत पीटर फिलीप नोरोन्हा सकाळीं घरा आयलो तेन्ना ताका अटक केली. दुसऱ्या दुबाविताचीय वळख पटल्या. ताचो सोद घेतात अशी म्हायती पुलीस निरिक्षक परेश नायक हांणी दिली.
घडणुकेच्या वेळार दुबावीत सोऱ्याचे घुंवळेत आशिल्ले असो दावो पिडितेच्या कुटुंबान केला. आमी जेवपाक वतालीं. आमचे गाडये मुखार एक गाडी उबी आशिल्ली. देखून संबंदीत टॅक्सी ड्रायव्हराक ताची गाडी मात्शी कुशीक व्हरपाची विनवणी केली. पूण तो तिडकलो आनी म्हाका गाडी कुशीक व्हरपाक सांगलेच कित्याक, अशें म्हणून गाळी संवपाक लागलो, अशें कागाळदार कुटुंबान सांगलें.
ते उपरांत आनीक एक दुबावीत ताचे मजतीक आयलो आनी तांणी मेळून पिडीत कुटुंबाक मारपाक सुरवात केली. कुटुंबातल्या बायलांकूय मारपेट केली आनी धमकी दिली. सुमार धा मिनटां हो प्रकार चालूच आशिल्लो. कुटुंबातल्या कांय वांगडी मोबायलाचेर व्हिडियो काडपाक लागले तें पळोवन दुबावीत पळून गेले अशें त्या कुटुंबान सांगलें.
गोंय पुलिसांनी आनी सरकारान गुन्यांवकारांचेर खर कारवाय करून आमकां न्याय दिवचो. कारण अशें प्रकार पर्यटकांक बरोबर घडपाक जायनात. पर्यटकांक सुरक्षा दिवप ही थळाव्या प्रशासनाची जापसालदारकी आसा. देश-विदेशांतल्यान व्हड प्रमाणांत पर्यटक गोंयांत येतात. तांकां गोंयांत सुरक्षीत दिसपाक जाय अशी मागणी कुटुंबान केल्या.
मजगतीं, हे घडणुकेक लागून पर्यटकांचे सुरक्षेचो प्रस्न परतून मुखार आयला. हे घडणुकेचो व्हिडियोय सोशल मिडियाचेर व्हायरल जाला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
