आयज सकाळीं 6 वरांचेर दिल्ली एक्यूआय 391 चेर
भांगरभूंय | प्रतिनिधी
नवी दिल्ली, खबरां संस्था ः राजधानी दिल्लीची हवा परत एक फावट विखारी जाल्या. काल रातीं उसरां एक्यूआय 400 पार जालो. ताचे उपरांत आयज 1 नोव्हेंबराक सकाळीं 6 वरांचेर दिल्ली एक्यूआय 391 नोंद जालो. देशांतल्या 10 प्रदुशीत शारां मदीं 9 शार उत्तर प्रदेशांतलीं आसात. संभल, यूपी हांगा सगळ्यांत चड एक्यूआय 388 नोंद जालो.
दिवाळे दिसा (31 ऑक्टोबर) सांजवेळा 5 वरांचेर दिल्लींत रियल टायम एअर क्वालिटी इंडेक्स (एक्यूआय) 186 नोंद केलो. म्हणल्यार 10-12 वरां भितर हवेची सामान्य स्थिती सामकी वायट जाली.
दिल्लींत बंदी आसून लेगीत हजारांनी लोकांनी फोग लायलो. दिल्ली प्रदुशण नियंत्रण समितीन 1 जानेवारी 2025 मेरेन फोगाचेर बंदी घाल्या. माराणे तयार करप, सांठोवप, विक्री करप आनी वापरप हाचेर बंदी आसा. तांचे ऑनलायन वितरणाचेरय बंदी घाल्ली तरी लेगीत लोकांनी फोग लायलो.
एक्यूआय म्हणल्यार एक प्रकारचो थर्मामीटर. तातूंत तापमानापरस प्रदुशणाचें प्रमाण मेजतात. ह्या प्रमाणांत हवेंतल्या CO (कार्बन डायऑक्सायड), ओझोन, NO2 (नायट्रोजन डायऑक्सायड), PM 2.5 (पार्टिक्युलेट मॅटर) आनी PM 10 प्रदुशणाचें प्रमाण तपासतात आनी शून्य ते 500 मेरेनच्या रीडिंगांत दाखयतात.
हवेंत प्रदुशणाचें प्रमाण जितलें चड आसतलें तितली एक्यूआय पातळी चड आसता. आनी एक्क्यूआय जितलो चड आसतलो तितलो धोको चड आसता. 200 ते 300 मदलो एक्यूआय वायट मानतात. राजस्थान, हरियाणा, दिल्ली आनी उत्तर प्रदेशांतल्या जायत्या शारांनी एक्यूआय 300 वयर गेला अशी परिस्थिती आसा. हो वाडत वचपी एक्यूआय म्हळ्यार भलायकेक धोको निर्माण करपाचे लक्षण.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
