भांगरभूंय | प्रतिनिधी
म्हापशें, प्रतिनिधीः गाववाडी- हणजुण्यां एका घराक उजो लागून २ लाखांचें लुकसाण जालें. हो उजो कसो लागलो हें कारण आजूनय स्पश्ट जावंक ना. ही घडणूक बुधवारा रातच्या सुमार बारा वरांचेर श्री भुमिका देवळा लागसारा घडली. घडणुके वेळार घरांत कोणूच नाशिल्लीं. उज्यांत दोन खाटी, इन्व्हर्टर बॅटरी, आयदनां, लायटीचें सामान, आल्मार आनी हेर सामान हुलपलें. आशिकुशीकची मालमत्ता उजो पालोवपी दळान वाटायली.
घडणुकेची म्हायती मेळटांत म्हापशें उजो पालोवपी दळाचे उपअधिकारी ज्ञानेश्वर सावंत हांच्या फुडारपणा खाला योगेश आमोणकर, रिचर्ड त्रिनिदाद, तुकाराम रेडकार आनी अक्षय सावंत ह्या जवानांनी उजो पालयलो. उजो लागपाचें नेमकें कारण सोदपा खातीर उजो पालोवपी दळाचे जवान वीज तशेंच पुलिसांक पत्र धाडटले. हे घडणुकेचो पंचनामो हणजूण पुलिसांनी केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
