भांगरभूंय | प्रतिनिधी
आगरवाडो चोपडें पंचायतीचे ग्रामसभेंत थाराव मंजूर
भांगरभूंय । प्रतिनिधी
पेडणें: सरपंचाची निवड पंच वांगड्यां बदला थेट मतदारांनी करची अशी मागणी करपी थाराव आयतारा जाल्ले आगरवाडो चोपडें पंचायतीचे ग्रामसभेंत मंजूर केलो. तशेंच चोपडें दोंगरमाथ्यार ब्रह्मा एनव्हारो कंपनीक दिल्ले सगळे तरेचे नाहरकत दाखले बेगिनात बेगीन फाटीं घेवचे, असोय थाराव ह्या वेळार मंजूर केलो.
सरपंच सचीन राऊत हांचे अध्यक्षते खाला जाल्ले ग्रामसभेक उपसरपंच शिल्पा नायक, पंच संगिता नायक, दीपाली लिंगुडकार, भगीरथ गांवकार, अँथनी डिसोझा, हेमंत चोपडेंकार, सचीव माटे हाजीर आशिल्ले.
ह्या वेळार पंचायत वाठारांतल्यो विवीध समस्या आनी हेर विशयांचेर खोलायेन चर्चा जाली. तातूंत मुखेलपणान आगरवाड्या वयली उदकाची टांकी, आगरवाडो- चोपडें मुख्य रस्तो आनी भितरले रस्ते, कोयराचीं बल्लां, सोपो कर पावणी, बेकायदो रेंव काडप, रस्त्याचेर सासणाच्यो उब्यो केल्ल्या गाडयांक लागून येरादारीक जावपी आडखळ, चोपडेंचें बेकायदो जमीन रुपांतरण प्रकरण, चोपडें पुला लागसार एका आस्थापनाचो बेकायदो स्विमींग पूल, सोपो करांतल्यान वगळिल्लीं देवस्थानां, आगरवाड्या वयल्या आदर्श नगरांतल्या लोकां खातीर मसुंडी, ह्या विशयाचेर जाल्ली चर्चा खुबूच तापली.
ह्या वेळार हाजीर आशिल्ल्या लोकांनी पंचायत मंडळाक धारेर धरले. सर्वे नं. 17/1, 10/1 ई, 20/1 ए ह्या सर्वे नंबराच्या दोंगरमाथ्या वयल्या नो डॅव्हलॉपमेंट झोनांत झोन बदलाचेर खोलायेन चर्चा करून ह्या ब्रह्म आस्थापनाक दिल्ले नाहरकत दाखले बेगिनात बेगीन फाटीं घेवपाचो थाराव सगळ्यांनी मंजूर करून ताचेर कायदेशीर कारवाय करपाची मागणी केली. तशेंच ज्या पंचायत मंडळाच्या काळांत ह्या आस्थापनाक नाहरकत दाखलो दिल्लो तांची नांवां जाहीर करपाचीय मागणी लोकांनी केली.
चोपडेंचो सायकल ट्रॅकाचेर चर्चा करून तो आदले वरी करतले, अशें सांगलें. सोपो कर पावणेंतल्यान देवस्थानांक वगळिल्ल्यान पंचायतीक लाखांनी रुपयांचें लुकसाण जालां, हे खातीर लोकांनी पंचायत मंडळाक धारेर धरले. पंचायतीचो महसूल बुडोवपी हो नेम रद्द करून आदले वरी सोपो कर पावणी करची, असो थाराव संमत केलो. शापोरा न्हंयेंत बेकायदो रेंव काडपाच्या प्रकरणाचेर चर्चा करून हाका जापसालदार आशिल्ल्यांक दर्यादेग पुलिसांचेर कारवाय करपा खातीर वरिश्ठां कडेन कागाळ करपाचें थारायलें.
ह्या वेळार जाल्ले चर्चेंत विवेक गांवकार, संजीव गांवकार, नरेश चोपडेंकार, अमोल राऊत, पिटर फर्नांडीस, एकनाथ चोडणकार, अनील शेट्ये, गुणाजी अमेरकार, उमेश लिंगुडकार हांणी वांटो घेतलो. सरपंच सचीन राऊत हांणी येवकार दिलो, पंचायत सचिवान उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
