भांगरभूंय | प्रतिनिधी
फोंडें, प्रतिनिधी : फोंडें आनी धारबांदोडें म्हालांतल्या राष्ट्रीय महामार्गार हेडगीं गोरवां वाडल्यांत. फाटल्या एक- दोन म्हयन्यांत जायत्या दुचाकींचो धपको बसून चालक जखमी जाल्यात. जड वाहनांचो धपको बसून गोरवांकूय मरण आयिल्ल्याच्यो घडणुकोय वाडल्यात. रस्त्यावेल्या वाडपी गोरवांक लागून अपघातांचें प्रमाण वाडपाची शक्यताय आसा.
राष्ट्रीय महामार्गार वाडपी हेडगीं गोरवां अपघातांक आमंत्रण दिता. रस्त्यार व्हडा संख्येन गोरवां दिसतात. ताचो परिणाम वाहन चालकांचेर जाता. गोरवांक लागून जायत्या दुचाकी चालकांक अपघात जावन तांकां मरण आयिल्ल्याच्यो घडणुको घडल्यात. कांय दिसां पयलीं हांगच्या उड्डाण पुलार गोरवां रस्त्याचेर आयिल्ल्यान माल व्हरपी ट्रक कोसळून अपघात घडिल्लो. कर्नाटक आनी हेर राज्यांतल्यान व्हडा संख्येन येवपी वाहनां धारबांदोडें म्हालांतल्या मोलें चेक नाक्यावेल्यान प्रवेश करतात. मोलें ते बाणास्तारी मेरेनच्या राष्ट्रीय महामार्गांचेर व्हडा संख्येन गोरवां दिसतात.
मजगतीं, ऑक्टोबरांत गोरवांक दुचाकीचो धपको लागून जायते चालक जखमी जाल्यात. हातूंत एक पत्रकार, एक पुलीस उपनिरीक्षक, पुलीस शिपाय आनी हेर एका सरकारी कर्मचार्याचो आसपाव आशिल्लो. गोरवांचेर पंचायत, नगरपालिकेन कितें तरी उपाय काडचो अशी मागणी चालक करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
