भांगरभूंय | प्रतिनिधी
मडगाव : कुणाल रायकार हांच्या अपहरणाच्या यत्नांत तांणी म्हजें नांव घुसयल्ल्यान म्हाका बरोच मनस्ताप जाला. नांव पिड्ड्यार जालां. दुकान विक्री वेव्हाराचे पयशे परत दिवपाक मेळनाशिल्ल्यान तांणी हो डाव खेळ्ळा आसतलो. हातूंत आपल्याक बरीच बदनामी सोंसची पडल्या, अशें मत रुबेन वेर्णेंकार हांणी उक्तायलें.
ओमनी गाडयेंतल्यान येवन पिस्तुलाचो भंय दाखोवन आकें मडगांवां कुणाल रायकार हांचें अपहरण करपाचो यत्न जालो. ह्या वेळार मारामारी जाल्ल्यान दुबावितांच्या पिस्तोलांतल्या गुळयांची मॅगझिनूय सकयल पडिल्ली. कुणाल रायकार हांणी हें सगळें रुबेन वेर्णेंकार हांणी घडोवन हाडिल्ल्याचें सांगिल्लें. ते प्रमाण मडगांव पुलिसांनी रुबेन हांचेर गुन्यांव नोंद केलो. तांची तीन दीस मडगांव पुलीस आनी गुन्यांव फांट्याच्या पुलिसांनी चवकशी केली. तशेंच रुबेन हांणी मडगांव न्यायालयांत केल्लो अटकपूर्व जामीन अर्ज न्हयकारला.
बुधवारा रुबेन हांचे सयत तांचे वकील कपिल वेर्णेंकार हांणी पत्रकार परिशद घेवन फकत पयशे परत दिवपाक मेळनाशिल्ल्यान हो आरोप केल्ल्याचो दावो केलो. अॅड. कपिल वेर्णेंकार हांणी सांगलें, कुणाल रायकार हांचें दुकान घेवपा खातीर रुबेन वेर्णेंकार हांणी ३ कोटी रुपया दिल्ले. हे विशींच्यो सगळ्यो पावत्यो पुलिसांक दाखयल्यात. हो वेव्हार जाले उपरांत दुकान नांवार करपाक सांगिना फुडें कुणाल हांणी मागीर करुया अशें सांगून वेळ काडलो. थारावीक काळा उपरांत वेव्हार जायनाशिल्ल्यान ताका पयशे परत दिवपाक सांगले. मजगतीं जें दुकान कुणाल रायकार हांणी रुबेन हांकां दिवपाचें कबूल करीत पयशे घेतिल्ले, ताचो अर्दो भाग कुणाल हांणी पयलींच कोणाक तरी विकिल्लो. कुणाल हांणी हें सगळें नाटक केल्ल्याची शक्यताय आसा. कुणाल हांणीच हें अपहरण नाट्य घडोवन हाडून रुबेन हांचें नांव मुखार केल्ल्याची शक्यताय अॅड. वेर्णेंकार हांणी उक्तायली.
न्यायालयान अटकपूर्व जामीन हो तांत्रीक विशयांचेर न्हयकारला. हे विशीं रुबेन हाका अटक करपाची गरज नाशिल्ल्यान ह्या अर्जाची गरज नाशिल्ल्याचें म्हणलां. ताका लागून ह्या प्रकरणांत रुबेन हांचें नांव कुणाल हांणी मुद्दाम घुसयल्ल्याचें दिसून येता अशेंय तांणी म्हणलें.
रुबेन हांणी सांगलें, दुकान नांवार करुन दिवपा खातीर ४ कोटी दिवपाचे थारिल्लें. ते प्रमाण ३ कोटी रुपया विवीध सुवातांचेर तडजोड करून रीण काडिल्लें.
ह्या प्रकरणांत घुसयल्ल्यान आपले वांगडा आपल्या कुटुंबाकूय मनस्ताप सोंसचो पडला, अशेंय तांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
