भांगरभूंय | प्रतिनिधी
मडगांव : हेर राज्यांतल्यान गोंयांत ट्रका वरवीं भाजयां वांगडा सांठोवन हाडिल्लीं खव्यांचीं ३० किलोचीं १४ बॅगां मडगांव बस स्टॅण्डाचेर जप्त केलीं. हो सुमार १ लाख ६३ हजारांचा माल आशिल्लो. ही कारवाय अन्न आनी वखदां खात्या वतीन जाली.
अन्न आनी वखदां खात्याच्या अधिकार्यांनी परबांच्या काळांत भायल्या राज्यांतल्यान येवपी बसीं वरवीं येरादारी करपी विंगड विंगड खावपाच्या जिन्नसांची तपासणी केली. ही तपासणी मोहीम साश्टीक राबयल्ली. बुधवारा सकाळीं साडे वरांचेर मडगांव कदंब बसस्टॅण्डाचेर आनी एसजीपीडीए मार्केट हांगच्यान हे मोहिमेक सुरवात जाली. दरेकी ३० किलोच्यो सुमार १४ पोतयो जप्त केल्यो. जातूंत योग्य एफएसएसएआय लेबल डिक्लेरेशना बगर खवो ट्रका वरवीं व्हरताले. योग्य साठवणूक करिनासतना ट्रकांतल्यान भाजीपाल्या सयत खव्याचें सामान दवरिल्ल्याचें दिसलें. अन्न आनी वखदां खात्या वतीन हो सुमार १,६३,८०० रुपयांचो माल जप्त केलो. भौशीक भलायकेच्या हिता खातीर ह्या सगळ्या मालाचो विलो लायलो.
हे मोहिमेंत अधिकारी संज्योत कुडाळकार, अन्न सुरक्षा अधिकारी प्रिया देसाय, अमित मांद्रेंकार, अभिषेक नायक, केन कार्व्हालो, स्नेहा नायक, नमुना तपासणी निरीक्षक साईनाथ मांद्रेंकार, एमटीएस गौरेश गांवकार आनी चालक संदीप शेळके हांणी अन्न आनी वखदां खात्याची संचालक श्वेता देसाय हांच्या मार्गदर्शना खाला ही कारवाय केली. परबांच्या काळांत ही मोहीम सुरू उरतली अशें ह्या वेळार सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
