भांगरभूंय | प्रतिनिधी
म्हापशें, प्रतिनिधी : आसगांव पठाराचेर कोयर उडोवचो न्हय अशें उच्च न्यायालयाचे निर्देश आसून लेगीत म्हापशें पालिका आदेशाचो अपमान करून हांगा हाडून हाडून कोयर उडयता. हाची गंभीर दखल घेवन, आसगांव कोमुनिदादीन गोंय प्रदूशण नियंत्रण मंडळाकडेन लेखी कागाळ केल्या. ते प्रमाण मंगळारा जीपीएसबीन आसगाव कोमुनिदाद, कोयर वेवस्थान अधिकार्यां वांगडा हे सुवातेची तपासणी केली.
आसगांव सडो हो आसगांव कोमुनिदादची सुवात. हे सुवातेर फाटलीं जायतीं वर्सां म्हापश्यां पलिका कोयर हाडून उडयताली, उपरांत थंय कोयर वेगळो करताले. हाचो परिणाम, ह्या कोयराक लागून हांगा आशिकुशीक घाणयारो वास तशेंच कोयराचें उदक झिरपून तें आसगांव वाठारांतल्या लोकांच्या बांयांनी वचून थंयचें उदक प्रदुशीत जाल्ल्याच्यो कागाळी वाडिल्ल्यो. ताका लागून आसगांव कोमुनिदादीन उच्च न्यायालयांत वचून हे विशीं याचिका दाखल केल्ली. ते प्रमाण न्यायालयान म्हापशें पालिकेक हांगा कोयर उडोवचो न्हय. तशेंच कोयर वेवस्थापना खातीर वेवस्था करपाक सांगलें. म्हापशें पालिकेन कुचेली हांगा प्रकल्प उबारलो. तरीय आजूनय पालिका अदीं मदीं ह्या आसगांव पठाराचेर हाडून कोयर उडयता. ताका लागून हो विशय मात्सो खर जाला.
म्हापशें पालिकेंतल्या अभियंत्यांनी सांगलें, पालिका शारांतल्या कोयराचें वर्गीकरण हें कुचेली प्रकल्प तशेंच हेर कंपोस्टींग सुवातेरूच करता. मात, हॉट-स्पॉटाचेर कोयर उडयता, मागीर हांगा हाडून मागीर तो वेगळो करता असो दावो तांणी केलो. तशेंच अभियंते हे विशीं आनीक उलोवंक ना. आयचे पळोवणे विशीं आसगांव कोमुनिदादचे अटर्नी नेल्सन फर्नांडीस हांणी, मुळांत म्हापशें पालिका आमच्या कोमुनिदादचे सुवातेर कोयर उडयता. पालिकेक आमची सुवात फुकट वापरपाची आसा. सध्या पालिका न्यायालयाच्या आदेशाचा अपमान करता, हे विशीं न्यायलयांत अपमान याचिका दाखल करतले. तशेंच येवपी दोन दिसांनी हे सुवातेर कोणूच प्रवेश करपाक शकचो ना हाचो विचार करून गेट उबारतले. तशेंच कोणेंय घुसपाचो यत्न केल्यार संबंदीतां आड पुलीस कागाळ करतले, अशें तांणी म्हणलें.
आसगांव कोमुनिदादच्या ह्या पठाराचेर म्हापशें पालिका ४० हजार चौ.मीटर सुवातेर आपलो कोयर उडयता. हाचो परिणाम आशिकुशीकच्या लोकांचेर जाता. तांकां घाणयारो वास, उदक जमनींत झिरपल्ल्यान लोकांच्यो बांयो प्रदुशीत जाल्ल्याचो दावो फर्नांडीस हांणी केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
