भांगरभूंय | प्रतिनिधी
1 जानेवारी 2024 ते 30 जून 2024 काळांतली आंकडेवारी
पणजी: गोंयांत 1 जानेवारी 2024 ते 30 जून 2024 ह्या स म्हयन्याच्या काळांत येरादारी नेमांचें उल्लंघन केल्ल्यान 6,496 जाणांचे वाहन परवाने येरादारी खात्यान निलंबीत केल्यात. हातूंत सगल्यांत चड 4,424 हॅल्मॅट घालूंक नाशिल्ल्यान जाल्यार 309 सोरो पियेल्ल्या चालकाचे परवाने निलंबीत केल्ल्याची म्हायती मुखार आयल्या.
देशांत दिसानदीस रस्तो अपघातांतल्या मरणां मदीं वाड जायत आशिल्ल्याची दखल घेवन सर्वोच्च न्यायालयान न्यायमुर्ती अभय मनोहर सर्पे हांचे अध्यक्षताये खाला नवी रस्तो सुरक्षा समिती स्थापन केल्या. मोटार वाहन कायदो 1988 च्या कलम 19 आनी केंद्रीय मोटार वाहन नेम 1989 च्या कलम 21 प्रमाण वाहन परवानो निलंबन करपाची तरतूद आसा. हे कारवायेची अंमलबजावणी करपाची शिफारस समितीन देशांतल्या सगल्या राज्यांक तशेंच संघ प्रदेशांक निर्देश दिल्यात. हाची दखल घेवन राज्यांत येरादारी पुलीस आनी येरादारी खात्या वयल्या शिफारशीची अंमलबजावणी करीत आसात.
येरादारी खात्यान वयल्या काळांत 6,496 जाणांचे वाहन परवाने निलंबीत केल्यात. तातूंत सगल्यांत चड हॅल्मॅट घालूंक नाशिल्ल्यान 4,424, गतीन वाहन चलयिल्ल्यान 989, मोबायलाचो वापर केल्ल्यान 328, सोरो पियेवन वाहन चलयिल्ल्यान 309, येरादारी सिग्नलाक पाळो दिवंक नाशिल्ल्यान 237, दुचाकी फाटल्यान तीन ते चार जाणांची येरादारी केल्ल्यान 152, म्हालवाहू वाहनांतल्यान प्रवाशांची येरादारी केल्ल्यान 51, निश्काळजीपणान वाहन चलोवन अपघात केल्ल्यान 5 आनी सीट बेल्ट घालूंक नाशिल्ल्यान एक अशे मेळून 6,496 जाणांचे वाहन परवाने येरादारी खात्यान निलंबीत केल्यात.
मजगतीं, वयल्या काळांत वाहन नेमांचे उल्लंघन केल्ल्या प्रकरणांत येरादारी पुलीस विभागान 13,318 जाणांचे वाहन परवाने निलंबीत करपाची शिफारस येरादारी खात्या कडेन धाडून दिल्या. तातूंत सगल्यांत चड हॅल्मॅट घालूंक नाशिल्ले 7,508, गतीन वाहन चलोवपी 3,461, वाहन चलयतना मोबायलाचो वापर करपी 641, सोरो पियेवन वाहन चलोवपी 639, सिग्नलाक पाळो न दिवपी 596, म्हालवाहू वाहनांतल्यान प्रवाशांची येरादारी करपी 108 हांचो आस्पाव आसा. दुचाकीचेर तीन वा ताचे परस चड जाणांची येरादारी केल्ले खातीर 365 जाणांचे परवानेय निलंबीत करपाची शिफारस येरादारी खात्याक केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
