भांगरभूंय | प्रतिनिधी
प्रुडंट मिडियाच्या आनीक चार जाणांक पुरस्कार जाहीर
पणजी: ‘गोवन वार्ता’चे दक्षीण गोंय ब्युरो चीफ अजय लाड हांकां सेगीत दुसऱ्या वर्सा राज्य पांवड्या वेलो पत्रकारिता पुरस्कार जाहीर जालो. तशेंच प्रुडंट मिडियाचे स्वप्नील तारी, शिरीष कुंकळ्येंकार, विक्रम नायक आनी विवेक प्रभू हांकांय विवीध गटांतले पुरस्कार फावो जाले.
म्हायती आनी प्रसिद्धी खात्यान दर वर्सा प्रमाण अंदूंय राज्य पांवड्या वेल्या पत्रकारिता पुरस्कारां खातीर पत्रकारां कडल्यान अर्ज मागयिल्ले. विवीध गटांतल्यान हे पुरस्कार मंगळारा जाहीर केले. ‘गोवन वार्ता’चे दक्षीण गोंय ब्युरो चीफ अजय लाड हांकां फाटल्या वर्साय हो पुरस्कार फावो जाल्लो. अंदूंय तांकां ‘सरकारची कामगिरी’ हे खबरे खातीर पुरस्कार जाहीर जाला.
प्रुडंटाचे प्रतिनिधी स्वप्नील तारी हांकां ‘महिला आनी बाल/समाजीक समस्या’ ह्या गटांतल्यान, शिरीष कुंकळ्येंकार हांकां कला आनी सस्कृती गटांतल्यान, विक्रम नायक हांकां भलायकी आनी भौशीक नितळसाण गटांतल्यान, विवेक प्रभू हांकां गांवगिरी पत्रकारिता गटांतल्यान पुरस्कार जाहीर जाला.
सर्वोत्कृश्ट संपादक गटांतल्यान ‘गोमन्तक’चे संचालक संपादक राजू नायक, फोटू पत्रकार गटांतल्यान टायम्स ऑफ इंडियाचे राजतिलक नायक, शिक्षण गटांतल्यान टायम्स ऑफ इंडियाच्यो गौरी मळकर्णेंकार जाल्यार खेळां गटांतल्यान टायम्स ऑफ इंडियाचे मार्कुस मेरगुल्हो हांकां पुरस्कार जाहीर जाल्यात.
मजगतीं, राष्ट्रीय पत्रकारिता दिसा निमतान 16 नोव्हेंबर दिसा जावपी सुवाळ्यांत ह्या पुरस्कारांचें वितरण करतले अशें म्हायती आनी प्रसिद्धी खात्यान जाहीर केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
