भांगरभूंय | प्रतिनिधी
म्हापशें: म्हापशें मार्केट सब यार्डांत अन्न आनी वखदां प्रशासनान धाड घालून इथापोन ह्या रसायना वरवीं केळीं पिकोवपी दुकानदाराक रंगेहात धरलो. दुबावीत असिफुल्ला हजरत अली करगुटली हाच्या दुकानांतलीं 9 क्विंटल केळीं प्रशासनान जप्त केलीं.
ही कारवाय मंगळारा सकाळीं अन्न आनी वखदां प्रशासनाच्या पंगडान केली. म्हापशें मार्केट यार्डांत प्रशासनाचे अधिकारी सदची पळोवणी करताले, तेन्ना वयलो दुकानदार केळ्यांचेर इथापोन ह्या रसायनाची फवारणी करीत आशिल्ल्याचें दिसून आयलें.
रोखडेच ह्या पंगडान ह्या दुकानाचेर धाड घाली आनी केळ्यांचे नमुने घेतले. ह्या दुकानांतलीं सगलींच केळीं रसायनाचो वापर करून पिकयिल्ल्याचें चवकशेंत दिसून आयलें. दुकानांतलीं वट्ट 9 क्विंटल केळीं पंगडान जप्त केल्यांत. उपरांत ह्या केळ्यांचो म्हापशें नगरपालिकेच्या आदारान विलो लायलो.
अन्न आनी वखदां प्रशासनाचे पदसिद्ध अधिकारी रिचर्ड नोरोन्हा, वरिश्ठ अन्न सुरक्षा अधिकारी राजाराम पाटील, अन्न सुरक्षा अधिकारी माधव कवळेंकार, विश्वास राणे, लेनीन डिसा, राम धुरी आनी भक्ती वाळके हांणी ही कारवाय केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
