भांगरभूंय | प्रतिनिधी
पर्यटन खात्यान हरकत घेतिल्ल्यान दर्यादेग वेवस्थापन प्राधिकरणाचो निर्णय
पणजीः मोरजी दर्यादेगेर कांसव सांबाळ सुवाते लागसारा दर्यादेगेर खांटी घालपाक गोंय दर्यादेग वेवस्थापन प्राधिकरणान हयकार दिला. हे विशीं रान खात्यान कांय निर्बंध घातल्यात आनी ह्या निर्बंधाक पाळो दिवप सक्तीचें केलां. कांसव वाठारांत प्राधिकरणान खाटी उबारपाक मनाय केल्ल्यान पर्यटन खात्यान आक्षेप घेतिल्लो. रान खात्याचो सल्लो घेतले उपरांत प्राधिकरणान दर शॅक धनयांक आतां पांच खाटी दर्यादेगेर घालपाक मेकळीक दिल्या.
शॅकांक परवानगी दितना प्राधिकरणान कांय दर्यादेगो अधिसुचीत केल्ल्यो, हातूंत मोरजेचो तेंबवाडो दर्यादेग कांसव संवर्धन क्षेत्र, हणजुणच्या दर्यादेगेवेले काय भाग, तशेंच मोरजी आनी मांद्रे दर्यादेगेवेले सायलंट झोन अधोरीखीत क्षेत्रांत खाटी घालपाक मेळना अशे निर्बंध प्राधिकरणान घाल्ले. पूण, ह्या निर्बंधाक पर्यटन खात्यान आक्षेप घेतलो आनी हे विशीं स्पश्टीकरण मागले. ह्या वाठारांत खाटी उबारपाक मेळटा काय कितें हे विशीं सल्लो घेवपाक प्राधिकरणान उप रान संरक्षकांक पत्र बरयलें.
तांच्या पत्राक जाप दितना रान खात्यान आपलें म्हणणें मांडून कांय सुचोवण्यो केल्यो. दर्यादेगेवेल्या खाटींचे संख्येचेर नियंत्रण आसपाक जाय, उसरां सांजे वा सुर्य मावळले उपरांत खांटी काडपाक जाय, दरेक पावसा उपरांत दर्यादेगेची रचना बदलता देखून रान खात्याचो सल्लो घेतले उपरांतच खाटी घालपा खातीर सुवात अधोरेखीत करची, खाटींचेर खाणांची वस्तु दिवच्यो न्हय कित्याक तर हाका लागून रस्ताद सुणीं एकठांय जातात, कोयराचो योग्य तरेन विलो लावचो आनी प्लास्टिकाचो वापर कसोच करचो न्हय, अशे निर्बंध रान खात्यान सुचोवणेंत सांगलें.
रान खात्यान घालून दिल्ल्या निर्बंधांचेर विचार करून मांद्रें आनी मोरजे कांसव संवर्धन वाठारांत खांटी उबारपाच्या पर्यटन खात्याचे मागणेक हयकार दिलो. पूण खांटी उबारचे पयली रान खात्यान घालून दिल्ल्या निर्बंधांक खरसाणेन पाळो दिवचो अशी अट प्राधिकरणान घातल्या. दर शॅकांक पांच खांटी घालपाची मेकळीक दिवन रान खात्याचो सल्लो घेतले उपरांतच खात्यान अधोरेखीत केल्ले सुवातेर ह्यो खाटी घालच्यो अशें प्राधिकरणान सांगलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
