भांगरभूंय | प्रतिनिधी
एमपीएच्या प्रस्तावांक सीआरझेड मान्यताय
पणजीः मुरगांव बंदाराचेर क्रुझ टर्मिनलांची उदरगत करपाक आनी हेर सुविधा उबारपा खातीर गोंय दर्यादेग उदगरत प्राधिकरणान मान्यताय दिल्या. ही उदरगत राष्ट्रहितान आशिल्ल्यान ह्या प्रकल्पांक मंजुरी दिवची अशी मागणी मुरगांव बंदर प्राधिकरणान (एमपीए) केल्ली.
वास्को शारांतल्या मुरगांव बंदरांत चलता नं. १ पीटी शिटी नं. ७ आनी चलात नं. ११ आनी पी.टी. शीट नं. ७ हे सुवातेत अंतरराष्ट्रीय तशेंच देशी क्रुझ टर्मिनल आनी हेर संबंदीत सुविधांची उदरगत करपा खातीर एमपीएन अर्ज केल्लो. प्रकल्प थळा भितर अस्तिवात आशिल्ल्या बांधकामाची दुरूस्ती करप हे उदरगतीचो हेत आसलो, अशें एमपीएन सांगलें.
हो प्रस्ताव प्राधिकरणाचे बसके मुखार आयलो. प्राधकरणांनी ह्या प्रस्तावाची पळोवणी केली आनी संबंदीत प्रकल्पांचेर सादरीकरण दिवपा खातीर प्रकल्प प्रस्तावक हांकां आफोवन घेवपाचो निर्णय घेतलो. उपरांत हे विशीं खोलायेन चर्चा केले उपरांत प्राधिकरणान वास्को मुरगांव बंदरांतल्या आंतरराष्ट्रीय तशेंच देशी क्रुझ टर्मिनला सयत हेर संबंदीत सुविधांची उदरगत करपाच्या प्रस्तावांक पाचवो बावटो दाखयलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
