भांगरभूंय | प्रतिनिधी
कांपाला वयल्या बांदोडकार क्रिकेट मैदानाचेर येजमान गोंय आनी नागालॅण्ड ह्या पंगडां मदीं चालू आशिल्ली प्लेट गटांतली रणजी मॅच उमळशीक वाडोवपी स्थितींत पावल्या.
आयज मॅचीच्या निमाण्या दिसा नागालॅण्डाक जैता खातीर आनीक 195 धांवड्यांची गरज आसा जाल्यार गोंयाक जैता खातीर 9 विकेटी जाय. पयल्या डावांत 32 धांवड्यांची आघाडी घेवपी गोंयान आपल्या दुसऱ्या डावांत 306 धांवड्यो करून नागालॅण्डा आड 338 धांवड्यांची आघाडी घेतली. पूण, तिसऱ्या दिसाच्या निमाण्या दोन सत्रांनी नागालॅण्डाचे ओपनर सॅदेझाली रुप्रियो आनी निश्चल डेगा हांणी पयले विकेटी खातीर 119 धांवड्यांची भागिदारी करून मॅचींत उमळशीक हाडली. सॅदेझालीन 153 बॉलांनी पांच चवक्यांचे मजतीन 48 आनी निश्चलान 169 बॉलांनी सात चवक्यांचे मजतीन 76 धांवड्यो करून खेळटा. निश्चल आनी सॅदेझालीची जोडी दर्शन मिशाळान फोडली. खेळ सोंपलो त्या वेळार हॅम छेत्री 12 धांवड्यो करून निश्चिलाक साथ दितालो.
ते पयलीं गोंयान 5 बाद 177 धांवड्यां वयल्यान खेळपाक सुरवात केली आनी 306 धांवड्यां मेरेन मजल मारली.
गोंया वतीन स्नेहल कवठणकारान 75, अर्जुन तेंडुलकरान 42, दर्शन मिशाळान 30 जाल्यार समर दुभाषीन 28 धांवड्यो केल्यो. नागालॅण्डा वतीन जे सुचीत आनी जॉनाथन हाणें दरेकी 4 विकेटी घेतल्यो, राजा स्वर्णकर आनी इम्लीवती हाणें एकेक विकेट मेळयली.
थोडे भितर धांवतकटोः गोंय (पयलो डाव) 179, नागालॅण्ड (पयलो डाव) 147, गोंय (दुसरो डाव) 92.1 ओव्हरींनी सगले बाद 306 धांवड्यो ( स्नेहल कवठणकार 75, दर्शन मिशाळ 30, समर दुभाषी 28, अर्जुन तेंडुलकर 42, मोहीत रेडकार 13, शुभम तारी नाबाद 0 धांवडी).
बॉलींगः राजा स्वर्णकर 10-1-41-1, जे सुचीत 29-6-81-4, नागाहो 13-1-36-0, आर जॉनाथन 22.1-3-59-4, होपॉंगक्यू 7-0-31-0, इम्लीवती 11-1-40-1.
नागालॅण्ड (दुसरो डाव) 56 ओव्हरींनी 1 बाद 145 (सॅदेझाली 48, निश्चल खेळटा 76, हेम छेत्री खेळटा 12 धांवड्यो.
बॉलींगः अर्जुन तेंडुलकर 10-2-26-0, शुभम तारी 6-2-8-0, दर्शन मिशाळ 22-10-43-1, मोहीत रेडकार 16-0-51-0, राहुल मेहत 3-0-8-0.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
