भांगरभूंय | प्रतिनिधी
धंयांतले, ताकांतले, दुदांतले, रोसांतले, कडयेंतले, गोडाचे, बटाट फोव…. रुच आयली न्ही? दिवाळी लागीं आयली की फोवांनी भरिल्ल्या ताटाची गोंयकारांक याद येता. फोव बाजारांत आयल्यात, माॅलांनी फोवां खातीर गर्दी. तांबडे आनी धवे फोव. पयलीं गोंयांत फकत अश्टम, धाकटी दिवाळी, व्हडले दिवाळेक फोव करप जातालें. आज तेच पूर्णान्न जालां. डाॅक्टर गुगल फोवांच्यो हजारांनी रेसिपीय शिकयता. फोवांचे कटलेट, भजीं, डोसा, भाकऱ्योय करुंक मेळटात. उरिल्ल्या, शेळ्या न्हय.
गोंयच्या दिवाळेंतले फोव आतां पुस्तकांनीय मेळटात. इंग्लीश, मराठी, कोंकणी, हिन्दी भाशेंतल्यान. नांवां विंगडविंगड. भारतांतल्या उत्तर, दक्षीण, पूर्वेक आनी पश्चिमेक. खंय कांदो तर खंय शेव, चटणी घाल्ले. चार- पांच तरांचे फोव गोंयचे दिवाळेचें खाशेलपण.
फोव करतना धुवा, सुनांक मीठ, मिरसांग कितली अचूक घालची हें सांगपाक लेखिका सुधाताई सुरेश आमोणकार हांचें पुस्तक उपेगी. पुस्तका परस भांगरभूंय दिसाळ्यांतल्या ताटार पळोवया फोव, सुधाताईंच्या पुस्तकांतले. जाय तशे बदल तुमी करुंक येतात. खावपी मनशां घरांत कितलीं आसात आनी खातात कितलीं ते प्रमाण. आदीं व्हडा तोपांनी करताले, आतां ल्हान आयदनांनी करुंक येतात.
1) दुदांतले फोव
1 पेलो/ वाटी गांवठी फोव (तांबडे), दूद – 4 पेले/ चार वाटयो, साकर – पाव पेलो/ वाटी, वेलची- दोन व्हडलीं कुलेरां वेलचेचो पीठो, काजूबियो – 7/ 8 बारीक केल्ल्यो, खिसमीस- 10/12, आसल्यार केशर- अर्द कुलेर.
कृती : दूद तापोवचें दाटसाण येय मेरेन, फोव बरे धुवचे. दुदांत घालून ते धवळत रावचे. बारीक गॅसार फोव शिजोवन घेवचे. साकर, काजूबियो, खिसमीस, केशर घालून दोन तिनदां धवळून गॅस बंद करचो. गरज पडल्यार, चड दाट जाल्यार दूद घालचें.
2) नाल्लाच्या रोसांतले फोव
फोव – गांवठी 2 वाटयो/ पेले, नाल्लाचो रोस 3 पेले, वाटयो (1 पेलो दाट रोस, 2 पेले पातळ), 10 ते 12 वेलचेचो पिठो (दोन व्हड कुलेरां), सुकीं हळदीपानां 1/2. गोड – देड पेले/ वाट्यो, मीठ दोन ल्हान कुलेरां.
कृती : फोव धुवन तशेच धा मिनटां उदकांत दवरचे. गॅसार उदक सळसळावन तातूंत फोव घालचे. मात्शे शिजतकीच दोन पेल्यांतलो नाल्लाचो पातळ रोस घालचो. मीठ, हळदीपानां घालून फोव बरे शिजतासर धवळत रावचे. उपरांत गोड घालून धवळचे. गोड विरगळटकीच नाल्लाचो 1 कप दाट रोस घालचो, पाच मिनटां शिजोवन घेवन गॅस पालोवचो.
3) ताकांतले, धंयांतले फोव
पातळ फोव – 1 पेलो, 1 वाटी, 2 वाटयो धंय, ताक, हरव्यो मिरसांगो- 2/ 3 बारीक चिरुन, कोथमीर, मीठ 1 ल्हान कुलेर, साकर दोन ल्हान कुलेरां.
कृती : फोव धुवून घेवन उदक काडून घेवचें. धंय, ताक पातळ करुन घेवन तातूंत मिरसांगो, कोथमीर, मीठ, साकर घालून मिक्स करुन घेवचे. उपरांत तातूंत फोव घालून दवरचे. गॅसार दवरचे न्हय.
4) बटाट फोव
1 वाटी/ पेलो फोव (गांवठी नाकात), दोन, तीन ल्हान/ एक व्हड बटाट, 1 ल्हान कुलेर जिरें, अर्द ल्हान कुलेर सांसवां, चिमटीभर हिंग, हळद, दोन हरव्यो मिरसांगो बारीक चिरुन, सोय, आलें, तेल, मीठ, लिंबाचो रोस, कोथमीर, सोय.
कृती – फोव धुवचे, उदकांतल्यान भायर काडून मात्शे दवरचे. दोन व्हडलीं कुलेरां तेल कायलीन/ फ्राय पॅनान घालचें. सांसवां, हिंग, जिरें, आलें घालून धवळचें. उपरांत उकडिल्लें वा हरवें बटाट तासून घालचें. मागीर मिरसांगो घालच्यो. थोडो वेळ शिजतकीच फोव घालून मिक्स करचे, धा मिनटां गॅस बारीक करुन दवरचे. गॅस बंद करुन लिंबाचो रोस, सोय घालची.
सुहासिनी प्रभुगांवकार
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
