भांगरभूंय | प्रतिनिधी
भ्रश्टाचार प्रकरणांत कोणाचेंच चुरचुरें करचे नात : मुख्यमंत्री
पणजी : सरकारी अधिकार्यां वांगडा हात मेळोवणी करून पुजा नायक हाणें २ नोकर्यो दिल्यात. तिच्या फोन कॉल लिस्टांत दोन सरकारी अधिकार्यांचे नंबर मेळ्ळ्यात. ह्या दोगांयची चवकशी जातली. भ्रश्टाचार प्रकरणांत राजकारणी वा सरकारी कर्मचारी हांतल्या कोणाचेंच चुरचुरें करचे नात, अशी शिटकावणी मुख्यमंत्री डॉ. प्रमोद सावंत हांणी दिली.
मुख्यमंत्री सावंत हांचे हस्तुकीं आयज पर्वरे दक्षता सप्तकाचें उक्तावण जालें. ह्या वेळार उलयतना तांणी ही शिटकावणी दिली. सरकारी कर्मचार्यांनी काम करतना सादूर रावपाची गरज आसा. सरकार वा प्रशासनांत कसलेच तरेचो संबंद नासतना एके बायलेन सरकारी नोकरी दिवपाच्या निमतान जायत्या जाणांक तोपी घाल्या. ही गजाल गंभीर स्वरूपाची. नोकरेचें हांयस दाखोवन फटींगपणां केल्ल्या प्रकरणांत अटक केल्ली पुजा नायक हिचे कडेन ५ गाडयो आसात. ४ ते ५ फ्लॅट आसात. तिणें उणेच १० विदेश दौरे केल्यात. चार म्हयन्यां आदीं पुजा नायक ही एकल्याक घेवन म्हज्या घरा आयिल्ली. कितें तरी खाजगी उलोवपाचें आसा अशें जेन्ना तिणें म्हाका सांगलें, तेन्नाच म्हाका दुबाव मारलो. उपरांत बायल शिपायाक आपोवन दिवचल पुलिसांक हांवें हे विशीं म्हायती दिली. तिका अटक जाली. चवकशे उपरांत तिका सोडली. आतां मेरेन तीन फावटीं तिका अटक जाल्या, अशें मुख्यमंत्र्यानी सांगलें.
भ्रष्टाचार प्रकरणांत आतां मेरेन ९ जाणांक अटक जाल्या. हातूंत २ सरकारी कर्मचारी आसात. एक निवृत्त जाला जाल्यार दुसरो सेवेंत आसा. ‘न खाऊँगा ना खाने दुँगा’ह्या धोरणा प्रमाण सरकारी कर्मचार्यांनी वागूंक जाय. कामांत फटींगपणां करप होय भ्रश्टाचाराचोच प्रकार. सरकारान आतां मेरेन १२१ सेवा ऑनलायन केल्यात. अशें मुख्यमंत्री सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
