भांगरभूंय | प्रतिनिधी
गोडेंमूत म्हळ्यार डायबिटीज. ह्या दुयेंसांत रगतांतले साकरेची पातळी नियंत्रीत दवरची पडटा. हांतूत साकर नियंत्रणा भायर गेली जाल्यार हेर दुयेंसां जातात. गोडेंमूताचे टायप- 1 आनी टायप- 2 अशें दोन प्रकार आसात. ह्या दुयेंसाची लक्षणां म्हळ्यार परत परत तान लागप, मुतपाक जावप, थाकाय येवप. गोडेंमूत जाल्यार योग्य आहार घेवप चड गरजेचें. योग्य आहार आनी व्यायामाच्या आदारान ताचेर नियंत्रण दवरुं येता. दोतोराचो सल्लो घेतकच फळांचो आहारांत आस्पाव करचो. साकर चड आशिल्लीं फळां शक्य तितलीं खावप टाळचीं.
केळी – केळ्यांनी कार्बोहायड्रेट आनी साकर चड प्रमाणांत आसता. हाका लागून रगतांतली साकर वाडूंक शकता.
द्राक्षां – द्राक्षांतय सैमीक रितीन साकर चड प्रमाणांत आसता. तशेंच ताचो ग्लायसेमिक इंडेक्स चड आसता. ताका लागून रगतांतली साकर वाडूंक शकता. देखून गोडेंमूत जाल्ल्या दुयेंतींनी द्राक्षां खावंक फावना.
काळिंग- काळिंगांत साकर चड आसता देखून गोंडेमूत आशिल्ल्या दुयेंतीन काळिंग चड खावचें न्हय.
सुकीं फळां- पासां, खाजूर, अंजीर ह्या सुक्या फळांनी साकर चड प्रमाणांत आसता. देखून गोडेंमूत जाल्ल्या दुयेंतींनी सुकीं फळां खावचीं न्हय. तशेंच चिकू, सीताफळां आनी आंबो ह्या फळांनी साकर चड आसता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
