भांगरभूंय | प्रतिनिधी
अ शें म्हणटात, जेवणाची वाट खंय पोटांतूच न्हय तर काळजांतल्यानूय वता. रुचीक जेवण रांदप बायल मनशेच्या रक्तांतूच आसता, अशेंय सगले म्हणटात. मोपा लग्न करून दिल्लें बाय दीपाली मोपकार तशें कोल्हापुरचें. थंय तें काम करतालें. लग्न जावन गोंयांत पावलें तेन्ना वेळ मेळटालो, ताचें कितें करप हो प्रस्न ताच्या मनांत आयलो. ताणें एकदां हस्तकलेच्यो वस्तू तयार करून स्टाॅलाचेर दवरिल्ल्यो. तेन्ना कांचनताई परुळेकार, स्नेहल मक्तेदार हांचे नदरेक त्यो पडल्यो. तांणी म्हणलें, तुज्या हातांत जादू आसा. असल्यो वस्तू आनीक कित्याक करीना? हातूंत तुजो वेळ पासार जातलो आनी हातांत चार पयशेय येतले. दीपालीक तें पटलें आनी ताणें हस्तकलेच्यो वस्तू करपाक सुरवात केली. मागीर खावपाचे जीनस करपाचो आग्रो जालो. तेय जीनस खूब खपपाक लागले. ह्या कामांत गोंयांतले प्रवचनकार रमेश सप्रे हांचेंय मार्गदर्शनूय उपेगी थारलें.
कोल्हापूरा दीपाली स्वयंसिद्ध संस्थेचो अणभव आशल्लो. 1992 सावन ही संस्था बायलां खातीर वावुरता. तातूंतलो अणभव वापरून दीपालीन गोंयांत बायलां खातीर संस्था सुरू केली. तांच्या वेळाचो बरो वापर कसो करप आनी तातूंतत्यान अर्थीक फायदो कसो करप हें तांकां पटोवन दिलें. दीपाली पदव्युत्तर मेरेन शिकलां. ताणें केल्लो आकाशदिवोय दिवाळेच्या दिसांनी सगल्यांत मानवलो. मागीर ताणें ह्यो वस्तू वेगवेगळ्या प्रदर्शनांनी मांडपाक सुरवात केली. लोकांक त्यो आवडल्यो. स्टाॅलांनी तें ह्यो वस्तू करप तेंय शिकयतालें. मागीर खावपाचो फराळ करपाची मागणी जाली. तें सांगता, ”आमचे संस्थेच्या बायलांक प्रशिक्षण, प्रबोधन, मजत करतां करतां आयज म्हजे लागीं तारा मोपकार, स्वरदा गाड हांचे सारक्यो तीस बायलो आसात. सगल्यो थळाव्यो आसात. तांकां हांव वेळच्या वेळार प्रशिक्षण दितां. लोकांक जाय त्यो वस्तू तयार करून विकतां. हातूंत राखी, तोरणां, आकाशदिवे, फराळ आसता. ताचें वेवस्थीत पॅकिंग करपाचें काम आमचीं बायलां करतात. आयज सगलीं खोशी आसात.” तांकां दीपालीन स्वावलंबी केलां अशें म्हणू येता. अर्थीक नदरेनूय फायदो जाता. सगल्याचो हिशोब करून दरेकाक तिचो वांटो दिता. खंयचेच बायलेची कागाळ ना. आयज गांवगिऱ्या वाठारांतल्यो बायलो स्वताच्या पायांचेर उबीं आसात. तांकां नोकरेची पसून गरज ना. तशी नोकरी तर आतां विकतूच घेवची पडटा. कांय नोकऱ्यां खातीर जबरदस्त वशिलो लावचो पडटा. इतले पयशे वा वशिलो गांवांतलीं गरीब बायलां खंयच्यान हाडटलीं? घरचें काम सांबाळून तीं ही कुशळटाय शिकल्यात. उमेदीन सगलें करतात. दीपाली म्हणटा, आयज बाजारांत तुमी कितेंय विकत घेवपाक गेलीं जाल्यार तातूंत भेसळ आसूं येता. ते खातीर लोकांक कितें खाता तें सारकें जाय आसता. देखून आमच्या जिनसांची मागणी दिसानदीस वाडत आसा. आमच्यो बायलोय फायदो पळयनासतना आपलो जीनस दर्जेदार कसो आसतलो हाची जतनाय घेतात. फक्त कंपन्यांतले कर्मचारी वर्क फ्राॅम होम करतात अशें ना. आमच्यो बायलोय घरचे काम करून हें काम लेगीत स्वाभिमानान करतात. जोडटातूय भरपूर. हें सगलें काम एके सुवातेचेर जावेचं हे खातीर बरीशी सुवात सोदपाक लागल्यांत. पळोवया केन्ना मेळटा ती. सध्या दीपाली हें काम आपल्या घरांतूच करता. तांकां तांचीं सपनां पुराय जावचीं अश्यो शुभेत्सा दिवया.
वता वता ः यत्ता धावेच्या विद्यार्थ्यां खातीर पर्वरेच्या राज्य शिक्षण संशोधन प्रशिक्षण मंडळान 5 जानेवारीक परीक्षा दवरल्या. मडगांवच्या डाॅन बाॅस्को काॅलेजींत तंत्रज्ञाना विशीं राष्ट्रीय प्रदर्शन 13 ते 15 नोव्हेंबराक जावपाचें आसा. तें मुद्दाम पळोवचें.
प्रा रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
