भांगरभूंय | प्रतिनिधी
नोकरी दिता अशें सांगून १५ लाखांक फटयलो
फोंडें, प्रतिनिधी: माशेलांत एका हायस्कुलांत शिक्षिकेची नोकरी दिवपाचें सांगून उसगांवचे एके बायलेक १५ लाख रुपया घेवन फटयली. ह्या प्रकरणांत फोंडें पुलिसांनी आयतारा सागर सुरेश नायक (कुर्टी – फोंडें) हाका अटक केली. हे विशीं कांय दिसां पयलीं पुलिसांनी गुन्यांव नोंद केल्लो. आयतारा अटक केल्लो दुबावीत पुलीस खात्यांतलोच कर्मचारी. फोंडें पुलीस निरीक्षक विजयनाथ कंवळेंकार हांणी एकाच दिसा दोन दुबाविताक अटक केली. दुबावितान आनीक खुबश्या जाणांक फटयल्ल्याचें चवकशे वेळार स्पश्ट जालें.
उसगांवचे तृप्ती रुद्रेश प्रभू हे बायलेक माशेलांतल्या एका हायस्कुलांत शिक्षिकेची नोकरी दिवपाचें हांयस दुबावितान दाखयिल्लें. ऑक्टोबर २०२२ सावन नोकरी दिवपाचें परत परत सांगिल्ल्यान ते बायलेन दुबाविताक १५ लाख रुपया दिल्ले. मात तांणी आजूनय नोकरी दिवंक नाशिल्ल्यान ते बायलेक कांय दिसां पयलीं फोंडें पुलीस स्टेशनांत कागाळ दाखल केल्ली. पुलिसांनी दुबाविता आड गुन्यांव नोंद करून ताचो सोद घेवपाक सुरवात केली. आयतारा फोंडें पुलिसांक दुबाविताक धरपाक येस आयलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.