भांगरभूंय | प्रतिनिधी
दुदसागरा वयल्या आजोबाक जीप धनयांनी घातलें गाराणें
फोंडें, प्रतिनिधी: कुळेंच्या दुदसागर टूर ऑपेरेटर संघटणे वतीन गोंय पर्यटन विकास मंडळान सुरू केल्लो कावंटर बंद करपाची मागणी केल्या. जो मेरेन तो बंद करिना तो मेरेन हंगामाची सुरवात जावची ना. जीप धनयांचो प्रस्न सरकारा मुखार सुरू आसा. हे खातीर आयतारा जीप धनयांनी एकठांय येवन दुदसागर आजोबाक गाराणें घातलें. दुदसागर टूर ऑपेरेटर संघटणेची मागणी पुराय करपा खातीर जीप धनी परत एकठांय आयल्यात.
कुळ्यां येवपी पर्यटकांक दुदसागर घसघश्याचेर घेवन वचपी जीप धनी सध्या गोंय पर्यटन विकास मंडळान सुरू केल्लो कावंटर बंद करपाची मागणी करतात. मागणी पुराय जावंक नाशिल्ल्यान आयतारा जीप धनयांनी दुदसागर आजोबाक गाराणें घालें. ह्या वेळार अध्यक्ष नीलेश वेळीप, सचिव नंदिश देसाय आनी हेर पदाधिकारी हजर आशिल्ले. जीप धनयांचो प्रस्न सोडोवपा खातीर ह्या मतदार संघांतले भाजपचे ज्येश्ठ कार्यकर्ते एकठांय आयिल्ले. हातूंत भाजप मंडळाचे अध्यक्ष विलास देसाय, आदले खासदार विनय तेंडुलकार, आदले बांदकाम मंत्री दीपक पाऊसकार आनी हेर कार्यकर्ते हजर आशिल्ले.
सगळ्या भाजप कार्यकर्त्यांनी संघटणेक फाटबळ दिवन हो कावंटर बंद करपाची मागणी केल्ली. हे संबंदी मुख्यमंत्री प्रमोद सावंत आनी थळावे आमदार गणेश गावकर हांचे कडेन बसका घेवन चर्चाय केल्ली. तेन्ना मुख्यमंत्री सावंत हांणी गोंय पर्यटन विकास मंडळान सुरु केल्लो कावंटर बंद करिनासतना १०० रुपया उणे करपाचो निर्णय घेतिल्लो. मात जीप धनी १०० रुपया उणे करचे न्हय, तर कावंटरूच बंद करचो अशी ठाम मागणी करतात.
मजगतीं, दुदसागर टूर ऑपरेटर संघटणेंत फूट घालपा खातीर जायत्यो घडामोडी सुरु आसात. दोन दिसां पयलीं एका वांगड्यान संघटणेच्या अध्यक्षा कडेन राजिनामो दिल्ल्याची वावडी उडल्या. हे विशीं चवकशी केले उपरांत समजलें, राजकी चेंपण आयिल्ल्यान ताणें राजिनामो दिवपाचो निर्णय घेतिल्लो म्हणून. मात प्रत्यक्षांत तांणी राजिनामो दिवंक ना अशें कळ्ळें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
