भांगरभूंय | प्रतिनिधी
पणजीः राज्यांतल्या मुळाव्या, माध्यमीक आनी उच्च माध्यमीक सरकारी शाळांनी अजूनय सुमार 400 शिक्षकांचो उणाव आसा. फुडल्या वर्सा कांय शिक्षक निवृत्त जावपाक लागल्यात. देखून तांचीं सुवातीय रितीं आसतलीं. अंदूं आनीक शिक्षकांची भरती जातली अशें शिक्षण संचालक शैलेश झिंगडे हांणी शेनवारा आमच्या प्रतिनिधी कडेन उलयतना सांगलें.
प्राथमीक आनी माध्यमीक पांवड्यावेल्या शिक्षकांची भरती कांय म्हयन्यां आदीं स्थापन केल्ल्या कर्मचारी भरती आयोगा वरवीं सुरू आसा. देखून उच्च माध्यमीक शिक्षकांची भरती गोंय लोक सेवा आयोगा वरवीं जाता. फुडल्या वर्सा टप्प्याटप्प्यान दोनूय आयोगांतल्यान शिक्षकांची भरती करून रित्या पदांचो आंकडो उणो जातलो अशें झिंगडे हांणी सांगलें.
कर्मचारी भरती आयोग तशेंच भौशीक सेवा आयोगान फाटल्या कांय म्हयन्यांत परिक्षे वरवीं शिक्षकांचीं रितीं पदां भरल्यांत. सध्या सुमार 400 पदां रितीं आसात आनी फुडल्या वर्सा जायते शिक्षक निवृत्त जातले आनी तांचीं पदांय रितीं उरतलीं. देखूनच फुडल्या वर्सा शिक्षकांची भरती नेटान जातली अशें तांणी सांगलें.
मजगतीं फाटल्या कांय वर्सांत शिक्षण खात्यान चडांत चड रितीं पदां भरपाक प्राधान्य दिल्लें. तशेंच जायत्या सुवातींनी शिक्षकांची नेमणूक जाल्या असो उल्लेख झिंगडे हांणी केला.
………………………………….
शिक्षकांच्या उणावाक लागूनच शाळा बंद पडल्यो
– सध्या राज्यांत सुमार 820 मुळाव्यो, माध्यमीक आनी उच्च माध्यमीक शाळा आसात. कांय वाठारांनी शाळांनी शिक्षकांचो उणाव आसा.
– शिक्षणाचेर ताचो परिणाम जाल्ल्यान पालक आपल्या भुरग्यांक सरकारी शाळांतल्यान काडून खाजगी शाळांनी धाडटात. शिक्षकांचो उणावूय सरकारी शाळा बंद जावपाचें एक कारण.
– फुडल्या वर्सा शिक्षकांची भरती बेगीन करपाचो निर्णय शिक्षण खात्यान घेतला अशें शिक्षण खात्यांतल्या सुत्रांनी स्पश्ट केलां.
………………………..
कर्मचारी भरती आयोगाक लागून उमेदवारांत उमेद
फाटल्या डिसेंबर सावन सरकारान कर्मचारी भरती आयोगा वरवीं सरकारी खात्यांतलीं ‘सी’ श्रेणीचीं पदां भरपाक सुरवात केल्या. कांय म्हयने आदीं आयोगान प्रशिक्षीत इंग्लीश शिक्षकांचीं पदां भरल्यांत. आयोगाची प्रक्रिया पारदर्शक आशिल्ल्यान शिक्षकाची नोकरी मेळोवपाक तयार आशिल्ल्या उमेदवारांत उमेद आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
