भांगरभूंय | प्रतिनिधी
आयज 11 जुलय. हो संवसारीक लोकसंख्या दीस. 11 जुलय 1987 ह्या दिसा संवसारांत पांच अब्जावें भुरगें जल्माक आयलें, तेन्ना सावन हो दीस संवसारीक लोकसंख्या दीस म्हूण पाळटात. लोकसंख्या हो सामको संवेदनशील विशय. ते निमतान…..
–
फकत 24 वर्सांत म्हणल्यार 1987 ते 2011 मेरेन संवसाराची लोकसंख्या दोन अब्ज वाडून सात अब्जांचेर पावली. हाचो अर्थ लोकसंख्या वाऱ्याचे गतीन वाडत आसा. कोणे वायट धरचें न्हय, पूण भारतांत लोकसंख्येची वाड संवसारांत सगल्यांत चड आसा. आयज भारताची लोकसंख्या सुमार १४० कोटींच्या आसपास आसा. स्वातंत्र्या वेळार आमची लोकसंख्या फक्त 30 कोटी आशिल्ली, म्हणल्यार फाटल्या 70 वर्सांत ती 110 कोटी वाडल्या. लोकसंख्येचे नदरेन भारत हो संवसारांतलो दुसऱ्या क्रमांकाचो देश, पूण फुडल्या 10 वर्सां भितर तो चीनाक फाटीं उडोवन संवसारांतलो क्रमांक एक लोकसंख्येचो देश जातलो, अशें भारतीय आनी विदेशी तज्ञांचें मत. अर्थांत, ही बरी, अभिमान दिसपा सारकी गजाल न्हय.
देशांतल्या सगळ्या समस्यांचें मूळ वाडत वचपी लोकसंख्येंत आसा. नेटान वाडत वचपी लोकसंख्येक लागून देशांत अन्न, कपडे, आलाशिरो, रोग, गरिबी, बेरोजगारी अश्यो साबार समस्या निर्माण जाल्यात. खास करून वाडत वचपी लोकसंख्या देशाचे उदरगतींत व्हड आडमेळीं जावपाक लागल्या. लोकसंख्येचे वाडीक लागून सगळ्या बाबींचेर परिणाम जावपाक लागला. देशांतल्या सगळ्या नागरिकांच्यो मुळाव्यो गरजो भागोवपाक सरकार घाम गळोवचो पडटा.
हे लोकसंख्येचेर नियंत्रण दवरपा खातीर सरकारा कडल्यान फावो ते यत्न चालू आसात. पूण, समाजा कडल्यान तांकां फावो तो तेंको अजूनय मेळना. कुटुंब नियोजन मोहीम सरकारी पांवड्यार प्रभावीपणान चालीक लागता ही गजाल बरी आसली, तरी चलोच जावचो म्हूण तीन ते चार चलयांक जल्म दिवपी व्हडलो वर्गय समाजांत आसा. ह्या आनी अशाच लोकांक लागूनच हे मोहिमेक गती मेळना. लोकसंख्या नियंत्रणांत हाडपा खातीर नवे पिळगेंत लोकसंख्ये विशीं योग्य दृश्टीकोन आनी जागृताय निर्माण करपाची गरज आसा. फकत 24 वर्सांत संवसारांतली लोकसंख्या पांच अब्ज वाडली आनी सत्तर वर्सांत देशाची लोकसंख्या 110 कोटी वाडली जाल्यार एकूण मनशाच्या जिविताचें कितें जातलें तें नवे पिळगेक सांगचें पडटलें. देशाची लोकसंख्या नियंत्रणांत हाडली ना जाल्यार मागीर सगळ्यांकच अडचणींक तोंड दिवचें पडटलें. धर्तरे वयल्यो साधनसुविधा कोणाक पावच्यो नात.
आमी एक संवसारीक महाशक्त जावपाचें सपन पळयतात. तें साकार जावपाचें आसल्यार वाडत वचपी लोकसंख्या आळाबंदा हाडचीच पडटली हें नवे पिळगेक समजावन सांगचें पडटलें. वाडटे लोकसंख्येक लागून जावपी प्रतिकूल परिणाम आनी समस्यां विशीं तांकां मार्गदर्शन करपा खातीर शाळा आनी म्हाविद्यालयांनी परिसंवाद घडोवन हाडचे पडटले. विद्यार्थ्यांचें प्रबोधन करचें पडटलें. लोकसंख्या शिक्षण म्हळ्यार अप्रत्यक्ष समाजीक शिक्षण, म्हणून फकत तरणाट्यांकच न्हय तर समाजाकय हें शिक्षण जाय. लोकसंख्या शिक्षण ही काळाची गरज. लोकसंख्या वाड थांबोवंक जाय, देशाक उदरगतीचे वाटेर व्हरून महाशक्त करपाक जाय जाल्यार लोकसंख्या देंवयले बगर आनी लोकसंख्या शिक्षणा बगर दुसरो पर्याय ना.
– श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
