भांगरभूंय | प्रतिनिधी
म्हापशें, प्रतिनिधी ः कोलवाळे फुलांचे हार विकप्या मदीं धंद्या वयल्यान वाद जाल्ल्यान सुरी हल्लो जालो. ह्या हल्ल्यांत गंभीर जखमी जाल्ले जंग बहाद्दूर (५०, थिवी) आनी देवानंद माळी (२१, रेवोडें) हांचेर जीएमसींत उपचार चलतात. जखमी जाल्ले दोगूय नात्यान आजो- नातू लागतात.
ही घडणूक शेनवारा सकाळीं 6 क सुमार राष्ट्रीय म्हामार्गावेल्या कोलवाळे- चिखली जंक्शनाचेर घडली. जंग बहाद्दूर हाणें घडणूक सुवातेवेल्या एका वाहन दुरुस्ती गॅरेजींत फुलांचो हार दवरलो आनी थंय दुचाकीचेर देवानंद माळीय आशिल्लो.
फुलांचे हार विकप्या वयल्यान तांचे मदीं वाद जालो. त्या जाग्यार देवानंदाक पळोवन बहाद्दुर थंय गेलो आनी ताचे कडेन वाद घालो आनी सुरी काडून ताचेर हल्लो केलो. हो हल्लो ताणें आपल्या हाताचेर घेतलो. उपरांत देवानंद हांणी बहाद्दुराच्या हातांतल्यान सुरी काडून घेवन ताच्या हातार आनी फाटीचेर सुरयेन घावे घाले. ह्या हल्ल्यांत दोगूय गंभीर जखमी जाले.
राष्ट्रीय म्हामार्गावेल्यान थळाव्या लोकांनी घडणुकेची म्हायती पुलिसांक दिली. हे घडणुकेची म्हायती मेळ्ळे बरोबर कोलवाळें पुलीस थंय पावले. ते मेरेन दोगूय जखमींक एम्ब्युलन्सांतल्यान म्हापशें जिल्हो हॉस्पिटलांत व्हेले आनी थंयच्यान फुडल्या उपचारा खातीर जीएमसींत धाडलें.
हे प्रकरणांत दोगांय जखमींनी कोलवाळें पुलिशेंत कागाळ केल्या. पुलीस फुडलो तपास करतात.
मजगतीं, जखमी जंग बहाद्दूर आनी देवानंद माळी हे दोगूय आजो- नातू आसात. फुलांचे हार तयार करुन आस्थापनांक वा दुकानदारांक दिवपाचो वेवसाय ते करतात. हे खातीर तांणी वाठार वांटून घेतिल्लो. पूण ताचे वेल्यान तांचे मदीं वाद जालो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
