कोंकणी मोगींनी एकठांय रावून भाशेची उदरगत करपाक जायः फा. मोउजीञु आताईद

भांगरभूंय | प्रतिनिधी

मडगांवां अखील भारतीय कोंकणी परिशदेच्या अधिवेशनाचे उक्तावण

मडगांव, अजय लाड ः कोंकणी आमची भास, कोंकणी आमची संस्कृताय, कोंकणी आमची अस्मिताय. आमच्या विचारांत फरक आसूं येता, पूण विरोध ना. म्हणून चळवळ करची न्हय. शांतताय आनी एकचार तिगोवन दवरपा खातीर एकठांय बसून मतभेदांचेर चर्चा करून ताचेर उपाय सोदून काडपाची गरज आसा. कोंकणी मोगींनी एकठांय रावून भाशेची उदरगत करपाक जाय अशें मत अखील भारतीय कोंकणी परिशदेचे अध्यक्ष फा. मोउजीञु द आताईद हांणी उक्तायले.
मडगांवा सुरू जाल्ल्या अखील भारतीय कोंकणी परिशदेच्या 33 व्या अधिवेशनांत फा. मोउजीञु द आताईद हांणी रोमीवादातल्यान भाशेच्या उदरगतीक आडखळ येतली आनी राजभास कायद्यांत घुस्पागोंदळ जावंक फावना अशें सांगलें. शिकागोंत जाल्ल्या सर्वधर्म परिशद अधिवेशनांत स्वामी विवेकानंद हांणी ‘भयणींनो आनी भावांनो’ अशा उतरांनी आपलें भाशण सुरु सगल्यांचीच मनां जिखलीं अशें फा. आताईद हांणी सांगलें. आपूण लेखक न्हय, कोंकणी कार्यकर्तो आसा. कोंकणी चळवळींतय आपलो वांटो आशिल्लो. देवनागरी कोंकणी अधिकृत लिपी करपाच्या प्रस्नाक कांय जाण विरोध करपाक लागले तेन्ना आमी मुखार आयले. आपल्या अध्यक्षपदाचेरूय रोमीवादी लोक प्रस्नचिन्न उबें करतात म्हणून हें सांगचें पडटा अशें तांणी सांगलें. कोंकणी उलोवप्यां मदले वाद आमकां आनी भास मुखार वचूंक दिवचें नात. कोंकणी अस्मिताय तिगोवन दवरपाची गरज आसा. कोंकणी लोक आपल्या भुरग्यांक इंग्लीश सुदारपा खातीर घरांत लेगीत कोंकणी उलोवपाक दिनात, अशेंय दिसून आयलां. कोंकणी उलोवप्यांनी एकामेकां कडेन कोंकणींतल्यान उलोवपाक जाय, अशें तांणी सांगलें.

सध्या राजभास कायद्यांत बदल शक्य ना…

कांय जाण कोंकणी विशीं वाद घालतात. कोंकणी वेव्हारीक वापरांत हाडपाची गरज आसा. कोंकणी भास पांच लिपींत उलयतात आनी साहित्य देवनागरी, कन्नड आनी रोमी लिपींत तयार जाता. सध्याचे परिस्थितींत राजभास कायद्यांत बदल करप शक्य ना. भारतीय साहित्य अकादमीन लेगीत कोंकणीक स्वतंत्र भास मानताना देवनागरीक कोंकणी प्रमाण मानली. देवनागरी कोंकणी लेखकांक साहित्य अकादमी, ज्ञानपीठ पुरस्कार फावो जाल्यात. कोंकणीचो स्थीर दर्जो अस्थीर करुं नाकात. ह्या वादांतल्यान कोणाकूच फायदो जावचो ना अशेंय फा. आताईद हांणी म्हणलें.

रोमी, कन्नड साहित्यांचो अणकार करात…

राजभास कायद्याक, साहित्य अकादमींतल्या आनी संविधानान दिल्ले हक्क आनी शिक्षणीक मळार कोंकणींचो वांटो बदलपाचो यत्न करपाक जायना अशेंय तांणी सांगलें. मनशाक आवडटा ते कोंकणी लिपींत साहित्य तयार करचें. एकमेकांक उर्बा दिवन कोंकणी भाशेक चालना दिवपाची गरज आसा. रोमी, कन्नड लिपींतलें साहित्य देवनागरींत अणकारीत करचें. अणकारा खातीर केंद्र स्थापन करचें अशीय सुचोवणी अध्यक्ष आताईद हांणी केली.

मराठी राजभास करपाची मागणी चुकीची…

मराठी ही कोंकणीची भयण आनी गोंयची साहित्यभास आनी मराठीक अभिजात भाशेचो दर्जो मेळ्ळा ही बरी गजाल. पूण मराठी ही गोंयची राजभास करपाची मागणी योग्य ना. लोकांची भास ही राजभास आसता. मराठी ही गोंयची लोकभास न्हय, ती फकत कोंकणी भास आसा. कोंकणीन मराठी कडेन दुस्मानकाय करूंक ना, पूण मराठीन ती केल्या. सरकारान कोंकणी खातीर सुविधा दिल्यार मराठी उलोवपी रोखडेंच वयर सरतले. आतां आमचे कांय कोंकणी वांगडी, रोमीवादी कोंकणीचे दुस्मान जाल्यात अशें फा. आताईद हांणी सांगलें.

रोमीवाद आतांचो….

भारतीय साहित्य अकादेमीन कोंकणीक मान्यताय दिली, कोंकणीचो राजभास कायद्यांत आस्पाव जालो, त्या वेळार रोमीवादी जागे जाल्ले जाल्यार कोंकणी भाशेक कांयच मेळचें नासलें. तेन्ना रोमीवाद नाशिल्लो, तो आतां सुरू जाला. गोंयांतल्यो जायत्यो कोंकणी भाशेच्यो शाळा रातोरात इंग्लीश जाल्यात आनी कोंकणी ही दुय्यम भास उरल्या. आतां उरिल्ली कोंकणी कांयजाण पुर्तुगेज करपाचो यत्न करतात आनी शिक्षणातली कोंकणीय बंद करपाचेय यत्न चल्ल्यात. ताका राज्यांतल्या कोंकणी मोगींनी बळी पडचें न्हय असो उलो फा. आताईद हांणी मारलो.