भांगरभूंय | प्रतिनिधी
नवी दिल्ली, खबरां संस्था ः दोतोरा कडेन पात्रताय वा कुशळटाय ना जाल्यारूच निश्काळजीपणाक ताका जापसालदार धरूं येता अशें सर्वोच्च न्यायालयान 28 वर्सां आदल्या प्रकरणांचो निकाल दितना सांगलें. न्यायाधीश पी एस नरसिंह आनी पंकज मित्तल हांच्या खंडपिठान सांगलें, जो मेरेन वैजकी वेवसायिकाक दुयेंतीची योग्य जतनाय वा उपचार दिवंक शकना अशें सिद्ध जायना. तो मेरेन निश्काळजीपणाचो गुन्यांव दाखल करुंक फावना. खरें म्हणल्यार 1996 वर्सा दोतोराच्या ऑपरेशनांत निश्काळजीपणा केल्ल्याच्या आरोपांच्या प्रकरणाचे सुनावणी वेळार न्यायालयान अशें सांगून दोतोराची निर्दोश सुटका केली आनी कागाळदाराची लुकसाण भरपायेची याचिका न्हयकारली.
नेमकें प्रकरण कितें?
दोतोरान 24 वर्सां आदीं एक ऑपरेशन केल्लें. कागाळदाराच्या म्हणण्या प्रमाण, ताच्या पुताक जल्मा सावन दाव्या दोळ्यांक समस्या आशिल्ली. 1996 वर्सा डॉ. नीरज सूद हांणी ह्या भुरग्याचें ऑपरेशन पोस्ट ग्रेजुएट इन्स्टिट्यूट ऑफ मेडिकल एज्युकेशन अँड रिसर्च (PGIMER), चंडीगढ हांगा केलें. ऑपरेशन करतना दोतोराक दोळो सारको करतना दाव्या दोळ्यांची पापणी मात्शी उखलून उजव्या दोळ्यां सारकी करची पडली. दोतोरान ऑपरेशनांत निश्काळजीपणा केला जाका लागून ऑपरेशना उपरांत भुरग्याची भलायकी आनीक इबाडली असो आरोप कागाळदारान केलो.
ह्या कारवाये उपरांत कागाळदारान डॉ. सूद आनी पीजीआयएमईआर हांचे आड निश्काळजीपणाचो आरोप दाखल केलो जो राज्य गिरायक विवाद निवारण आयोगान (SCDRC) 2005 वर्सा न्हयकारलो. उपरांत एनसीडीआरसींत कागाळ दाखल केली. एनसीडीआरसीन राज्य आयोगाचो निर्णय न्हयकारलो आनी उपचारांत दुर्लक्ष केल्ल्यान दोतोराक आनी हॉस्पिटलाक जापसालदार धरून 3 लाख रुपया लुकसाण भरपाय दिवपाचो आदेश दिलो.
उपरांत दोतोरान सर्वोच्च न्यायालयांत याचिका दाखल केली. डॉ. सूद आनी हॉस्पिटलान एनसीडीआरसीच्या आदेशाक आव्हान दिवन सर्वोच्च न्यायालयांत अपील दाखल केलें. कागाळदाराक डॉ. सूद वा पीजीआयएमईआर हांचे कडल्यान निश्काळजीपणा सिद्ध करपा खातीर कसलेच पुरावे मेळूंक नात. शस्त्रक्रिया उपरांत दुयेंतीची स्थिती इबाडली म्हणल्यार ऑपरेशन सारकें जावंक ना अशें न्हय अशें खंडपिठान सांगलें. कागाळदारान दोतोर वा पीजीआय कडल्यान कसलीच निश्काळजीपणा सिद्ध करूंक नाशिल्ल्यान तांकां कसलीच लुकसाण भरपाय दिवपाची गरज ना अशें न्यायालयान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
