भांगरभूंय | प्रतिनिधी
नवी दिल्ली, खबरां संस्था : बेकायदेशीर पद्दतीन अमेरिकेंत प्रवेश करपी भारतीयांचो आंकडो व्हड प्रमाणांत वाडला. वर्साभरांत अमेरिकेंत बेकायदेशीर रितीन प्रवेश करपाचो यत्न केल्ल्यान सुमार 90 हजार भारतीयांक ताब्यांत घेतल्यात. ह्या 90 हजार भारतीयांतले चडशे गुजरात राज्यांतले आसात, अशी म्हायती मेळ्ळ्या.
अमेरिकेच्या कस्टम्स अँड बॉर्डर प्रोटेक्शनाच्या अहवाला प्रमाण, भारतांतल्यान खास करून गुजरात राज्यांतल्यान बेकायदेशीर स्थलांतर करपी लोकांचो आंकडो व्हड प्रमाणांत वाडला. 2024 अर्थीक वर्सा 1 ऑक्टोबर 2023 ते 30 सप्टेंबर 2024 मेरेन अमेरिकेंत प्रवेश करपाचो यत्न करतना सुमार 90,415 भारतीयांक अटक जाली. अमेरिकेच्या कस्टम्स अँड बॉर्डर प्रोटेक्शनाच्या आंकडेवारी प्रमाण अमेरिकेचे शिमेचेर दर वराक 10 भारतीयांक अटक केल्या.
चडशे लोक मेक्सिकोंतल्यान कॅनडा वरवीं बेकायदेशीर रितीन अमेरिकेंत प्रवेश करपाचो पर्याय निवडटात, अशें अहवालांतल्यान स्पश्ट जालां. मेक्सिको मार्गा वरवीं शिमा हुपपाचे प्रमाण उणें जावपाचें कारण तुर्की आनी दुबय ह्या देशांनी वाडिल्ली देखरेख आसा, अशें तज्ञ म्हणटात. अमेरिकेच्या अधिकाऱ्यांनी केल्ल्या निरिक्षणांत जायते भारतीय नागरीक, खास करून गुजराती आतां कॅनडाचो मार्ग वेंचतात अशें दिसून आयला. कारण ह्या मार्गार उणो धोको आसा, अशें तांकां दिसता. अमेरिकेंत प्रवेश करपाचो यत्न करचे पयलीं जायते लोक विजिटर व्हिसा घेवन कॅनडांत प्रवेश करतात. मजगतीं, भारतांतल्यान अमेरिकेंत बेकायदेशीर स्थलांतराचे परिस्थितीची आंकडेवारी कांय प्रमाणांत बदलत आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
