भांगरभूंय | प्रतिनिधी
अशोक नायक : नोव्हेंबरांतली वेंचणूक जातली कायदेशीर पद्दतीनूच
भांगरभूंय । प्रतिनिधी
पणजीः भंडारी समाजाचें नांव बदनाम करपाचो यत्न चल्ला. समाज भावांनी तांचेर विस्वास दवरचो न्हय. आमचें फाटलें 6 वर्सांचें काम लोकांनी आमच्या कार्यालयांत येवन पळोवचें. आमी कसलेय चवकशेक तयार आसात, अशें भंडारी समाजाचे अध्यक्ष अशोक नायक हांणी सांगलें. तशेंच नोव्हेंबरांतली समाजाची वेंचणूक ही कायदेशीर पद्दतीनूच जातली, अशें तांणी स्पश्ट केलें.
भंडारी समाज समितीचेर प्रशासक नेमपाचो जिल्हो निंबधकाचो निर्णय उच्च न्यायालयान रद्द करून निबंधकान तांकां कारणां दाखयात नोटीस काडची, ह्या उच्च न्यायालयाच्या निर्णयाक येवकार दिवपा खातीर भंडारी समाजान पत्रकार परिशद घेतिल्ली. ह्या वेळार समाजाचे अध्यक्ष अशोक नायक, उपाध्यक्ष देवानंद नायक, सरचिटणीस फक्रू पणजीकार आनी हेर पदाधिकारी हाजीर आशिल्ले.
फाटलीं स वर्सां अनीश बकाल आनी आतीश मांद्रेंकार हे दोग जाण समितीचे यत्न करतात. दर पांच वर्सांनी समितीचे नोंदणीचें नुतनीकरण जाता. तरी लेगीत आमचे आड कोर्टांत वचपाचो यत्न चल्ला. आमी सगळे एक, आमचो गट ना. तरी लेगीत आमचे भितर फूट घालपाचे यत्न चल्ल्यात, अशे अशोक नायक हांणी सांगलें.
जिल्हो निबंधकांत जबरदस्तीन केस घालपाची गरजूच नासली. तरी लेगीत तांणी ते यत्न केले आनी प्रशासक नेमलो. आमची समिती निधीचें वेळा भितर ऑडीट करता. कोणाक जर दुबाव आसा जाल्यार तांणी कार्यालयांत येवन तें तपासचें, पूण ते गरजे भायर समाजाची बदनामी करतात. 5 लाखांचो हो परिवार. तातूंतले 15-16 जाण आमकां बदनाम करपाक उठल्यात, असो आरोप नायक हांणी केलो.
1962 त समाजाची घटना तयार जाल्ली आनी 2015 त तेन्नाचे सचीव उपेंद्र गांवकार हांणी तातूंत बदल केल्लो. ते पयलीं कोणाकूच घटने विशीं म्हायती नासली पूण आमी जेन्ना घटना बदल्ली तेन्ना आमकां लक्ष्य केले. ओबीसी सर्टीफिकेट भायल्या जातींच्या हातांत पडची न्हय म्हूण आमी ही घटनेंत सुदारणा केल्ली आनी ते खातीर आमकां हक्क आसा, अशें नायक हांणी सांगलें.
भायले जातींत लग्न करपाक समाजाचो कसलोच विरोध ना. पूण भायले जातींत लग्न जाले उपरांत मावडच्यांक जातीच्या आदारार हें ओबीसी सर्टीफिकेट मेळटा. महाराष्ट्रांतल्यान आयिल्ल्या कितल्याश्याच जाणांनी ओबीसी दाखलो घेतल्यात. हे बंद जावचें म्हूण आमी घटनेंत सुदारणा केल्ली, अशें रजांव नायक हांणी दिलें. 17 नोव्हेंबराक समितीचे वेंचणुके खातीर अर्ज भरपाक सुरवात जातली. आमी कोणाक वेंचचे नात वा नामांकीत करचे नात. कायद्याक आनी घटनेक धरुनूच नोव्हेंबरांत वेंचणूक जातली. इत्सुकांनी फॉर्म भरचो आनी आपलें पॅनल तयार करचें आनी वेंचणुकेंक फुडें वच्चे, असो उलो नायक हांणी मारला.
अशोक नायक समिती आड दिल्लो आदेश रद्द
गोमंतक भंडारी समाजाचे अध्यक्ष अशोक नायक हे समिती आड सोसायटी म्हानिरिक्षकांनी दिल्लो आदेश गोंयांतल्या मुंबय उच्च न्यायालयान रद्द केला. तशेंच दोनूय पक्षांक 4 नोव्हेंबराक दनपारच्या 3.30 वरांचेर संबंदीत यंत्रणेक कारणां दाखयात नोटीस जारी करून हाजीर रावपाचो आदेश दिला. ते उपरांत 20 सप्टेंबर 2024 ह्या दिसा दिल्ले कागाळेचेर सुनावणी घेवन दोन सप्तकांत निकाल जारी करपाचो आदेश दिला. हे विशींचो आदेश न्या. भारत देशपांडे हांणी दिला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
