भांगरभूंय | प्रतिनिधी
सुदिन ढवळीकारः ढवळे दिवाळी बाजाराचें उक्तावण
भांगरभूंय । प्रतिनिधी
फोंडें: गोंयांत अपघाताचें प्रमाण वाडत आसा. अशीर रस्त्यांक लागून अपघात जातात, अशें दिसून आयलां. ते खातीर रस्त्याचें रुंदीकरण खूब गरजेचें आसा. ते खातीर लोकांनी रस्त्याच्या रुंदीकरणाक विरोध करपा बदला आदार करचो, असो उलो वीज मंत्री सुदिन ढवळीकार हांणी मारलो.
ढवळेच्या सार्वजनीक गणेशोत्सव मंडळा वतीन दिवाळी बाजार मांडला. ताच्या उक्तावण सुवाळ्याक मंत्री ढवळीकार उलयताले. तांचे वांगडा जिल्हो पंचायत वांगडी गणपत नायक, सरपंच मनुजा नायक, उपसरपंच सुशांत कपिलेश्वरकार, पंच सोनाली तेंडुलकार आनी सार्वजनीक गणेशोत्सव मंडळाचे अध्यक्ष कपील ढवळीकार हाजीर आशिल्ले.
ढवळेच्या सार्वजनीक गणेशोत्सव मंडळा वतीन दिवाळी बाजार मांडटात. ते खातीर लोकांक बरे जिन्नस तशेंच सवाय मोलांत साहित्य मेळटा. गोंयांत खूबश्या मतदारसंघांनी गे आदीं दिवाळी तशेंच चवथीचो बाजार मांडला. पूण चडश्या मतदारसंघांतले बाजार बंद पडल्यात. ढवळीच्या सार्वजनीक गणेशोत्सव मंडळान मात फाटल्या कांय वर्सां सावन लोकांक गरजेचे आशिल्ले उपक्रम चालीक लावन सेवा दिवपांत योगदान दिलां, अशें मंत्री ढवळीकार हांणी सांगलें.
ह्या वेळार सरपंच मनुजा नायक आनी गणपत नायक हांणी आपले विचार मांडले. वेदांगी ढवळीकार हांणी येवकार दिलो आनी सुत्रसंचालन केलें. अजय सावयकार हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
