भांगरभूंय | प्रतिनिधी
नवी दिल्ली, खबरां संस्था ः सर्वोच्च न्यायालयान आधार कार्डा संबंदी व्हडलो निकाल दिला. पिरायेचो पुरावो म्हणून आधार कार्ड हो फावो तो दस्तावेज मानूंक फावना असो निकाल देशांतल्या सर्वोच्च न्यायालयान दिला. हाचे वांगडाच सर्वोच्च न्यायालयान पंजाब आनी हरियाणा उच्च न्यायालयाचो आदेशूय रद्द केला. जांतूत रस्तो अपघातांत बळी पडपी लोकांक लुकसाण भरपाय दिवपा खातीर पिरायेचो पुरावो म्हूण आधार कार्डाचो उपेग केल्लो.
बाल न्यायालय (भुरग्यांची देखरेख आनी संरक्षण) कायदो, 2015 च्या कलम 94 खाला शाळा सोडपाच्या प्रमाणपत्रांतल्यान मेल्ल्या मनशाची पिराय थारावपाक जाय आशिल्ली अशें न्यायाधीश संजय करोल आनी न्यायाधीश उज्जव भुईया हांच्या खंडपिठान स्पश्ट केलें. इलॅक्ट्रॉनिक्स आनी म्हायती तंत्रज्ञान मंत्रालयान 20 डिसेंबर 2018 दिसा जारी केल्ल्या अधिकृत अधिसुचोवणेंत भारतीय युनिक आयडेंटिफिकेशन अॅथॉरिटीन आपल्या परिपत्रक क्रमांक 8/2023 वरवीं आधार कार्ड वळख प्रमाणपत्र म्हणून वापरूं येता, पूण जल्म तारखेचे प्रमाणपत्र म्हणून वापरुंक मेळना अशें सांगलां.
एमएसीटी, रोहतक हांणी 19.35 लाख रुपया लुकसाण भरपाय दिल्ली. जी उच्च न्यायालयान 9.22 कोटी मेरेन उणी केली. कारण एमएसीटीन भरपाय थारावपा खातीर पिराय चुकीचे पद्दतीन मेजिल्ली. उच्च न्यायालयान आधार कार्डाच्या आदाराचेर मेल्ल्या मनशाची पिराय 47 वर्सां अशी मेजली.
पिराय थारावपाचो प्रस्न न्यायालयांत आयले उपरांत सर्वोच्च न्यायालयान आपल्या मुखार आशिल्ल्या दोनूय वटांचो युक्तीवाद आयकलो. तशेंच मोटार मोटार दुर्घटना दावा न्यायाधिकरण ( एमएसीटी) निकालाकय मान्यताय दिली. एमएसीटीन मेल्ल्या मनशाची पिराय ताच्या शाळा सोडपाच्या प्रमाणपत्राच्या आदाराचेर मेजिल्ली. 2015 वर्सा रस्तो अपघातांत मेल्ल्या मनशाच्या सोयऱ्यांनी दाखल केल्ले याचिकेचेर सर्वोच्च न्यायालयान हो निकाल दिला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
