भांगरभूंय | प्रतिनिधी
वास्को, प्रतिनिधी : गोवा शिपयार्डांतल्या रोजगारा खातीर गोंयच्या विशेश म्हळ्यार मुरगांव म्हालांतल्या तरणाट्यांक प्राधान्य दिवचें, अशी मागणी पंचायत मंत्री मॉवीन गुदिन्हो हांणी केल्या. हे विशींचें निवेदन गोवा शिपयार्डचे अध्यक्ष आनी वेवस्थापकीय संचालक ब्रिजेश कुमार उपाध्याय हांकां दिलां. ह्या वेळार मुरगावचे आमदार संकल्प आमोणकार, वास्कोचे आमदार कृष्णा साळकार हजर आशिल्ले.
मंत्री गुदिन्हो, आमदार साळकार, आमदार आमोणकार हांणी सध्या चालू आशिल्ल्या वांगडी मोहिमे विशीं चर्चा केली. नातें घट्ट करपा खातीर चडांत चड लोकांक भाजपाचे वांगडी करपाचें आमचें ध्येय आसा. मुरगांव, वास्को, दाबोळी मतदार संघांतल्या उदरगतीच्या कामां संबंधी चर्चा केली. थळाव्यांक हांगच्या केंद्रीय आस्थापनांनी नोकर्यो मेळचे खातीर चड भर दिल्या.
गोवा शिपयार्ड जरी केद्रां पडलें तरी थळाव्यांक थंय रोजगार मेळना. हें योग्य न्हय अशें गुदिन्हो हांणी सांगलें. येवपी काळांत दाबोळी विमानतळ, नौदल, मुरगांव बंदर प्राधिकरणाच्या संबंधितांक आपोवन तांचे मुखार थळाव्यांक नोकरेंत प्राधान्य मिळचे खातीर चर्चा करतले अशेंय तांणी स्पश्ट केलें.
आमोणकार हांणी सांगलें, गोवा शिपयार्डांत थळाव्यांक नोकर्यो मेळना. हेरांक मेळटात. ताका लागून थळावे तिडक उक्तायता. ते आमकां हे विशीं विचारून तिडक उक्तायतात. आदीं गोवा शिपयार्डांत चडांत चड थळावे कामगार दिसताले. मात आतां चित्र बदल्ल्याचें दिसता. थळाव्यांक नोकरेंत प्राधान्य दिवपाची मागणी आमी केल्या. ब्रिजेश कुमार उपाध्याय हांणी हे विशीं विचार करपाक वेळ मागला. थळाव्यांक गोवा शिपयार्ड आनी हेर सुवातांचेर रोजगार मेळचे खातीर आमी यत्न करतात. फाटल्या चोवदा म्हयन्यांनी ७० टक्के गोंयकारांक नोकर्यो दिल्ल्याचें उपाध्याय हांणी सांगलां. ते विशींचो अहवाल ते दितले अशें तांणी म्हणलें.
साळकार हांणी, गोवा शिपयार्डच्या अधिकारी वर्गाक हांव मेळिल्लो. तांचे मुखार कांय मुद्दे मांडले. ते विशीं संबंधीत अधिकारी वर्गान विचार करून सुधारणा केल्या. नोकरे खातीर कोंकणी भाशेची अट आमी मांडिल्ली. टप्प्याटप्यान थंयच्यो कांय गजाली पयस जातात. गोवा शिपयार्डांत गोंयकारां नोकर्यो दितात. तशेंच मुरगांव, वास्को, दाबोळी मतदार संघांतल्या तरणाट्यांक प्राधान्य दिवपाची गरज तांणी उक्तायली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
