भांगरभूंय | प्रतिनिधी
नवी दिल्ली, खबरां संस्था: बंगालचे खाडींत तयार जाल्लें ‘दाना’ चक्रीवादळ आयज दर्यादेगेर पावलें. हें वादळ ओडिशाक दाखल जालें. ताचें केंद्र भुवनेश्वरा लागीं आसा. सध्या ओडिशा आनी अस्तंत बंगालांत १०० ते १२० किलोमीटर प्रतितास वेगान वारें व्हांवता. ओडिशा आनी पश्चिम बंगालाच्या जायत्या वाठारांनी पावस सुरू आसा.
दाना चक्रीवादळाक लागून ओडिशाच्या जायत्या वाठारांनी झाडां हुमटून पडल्यांत. रस्ते बंद आसात. होर्डिंगां मोडल्यांत. हवामान खात्याच्या म्हणण्या प्रमाण, दर्यादेगेवेल्या वाठारांनी चड व्हड पावस पडूं येता. चक्रीवादळाक तोंड दिवपा खातीर सगले सुरक्षेचे उपाय केल्यात.
एनडीआरएफ, एसडीआरएफाचे पंगड सगल्याक तैनात आसात. जतनाय म्हणून ओडिशांतल्या १४ जिल्ह्यांतल्या १० लाख लोकांक थंयच्यान हालयल्यात. अस्तंत बंगालांत ३.५ लाख लोकांक सुरक्षीत थळार धाडल्यात. बंगाल आनी ओडिशांत ३०० उड्डाणां आनी ५५२ ट्रेनी रद्द केल्यात.
मजगतीं, महाराष्ट्रांत फाटल्या कांय दिसां सावन कांय वाठारांनी अदींमदीं पावस झडत आसा. परतीचो पावस महाराष्ट्रांतल्यान जरी फाटीं सरलो तरी कांय राज्यांनी हलक्या पावसाची शक्यताय आसा. एके वटेन अरबी दर्या आनी दुसरी वटेन बंगालच्या खाडयेंत उण्या दाबाचो पट्टो निर्माण जाल्ल्यान सध्या पावस कोसळतूच आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
