भांगरभूंय | प्रतिनिधी
काल 24 ऑक्टोबराक पुराय संवसारांत पोलियो दीस म्हूण मनयलो. पोलियोचे मुक्ती खातीर मोलाचें योगदान दिवपी शास्त्रज्ञ जॉन सॉल्क हांचो काल जल्मदीस. जॉन सॉल्क आनी तांच्या पंगडान पोलियोचें पयलें वासीन सोदून काडलें म्हणून तांच्याच जल्मदिसा संवसारीक पोलियो दीस म्हूण मनोवपाचो निर्णय संवसारीक भलायकी संघटणेन घेतलो. कालच्या दिसा कडेन पोलियो कडेन दिल्ल्या येसस्वी लढ्याचे प्रतीक म्हूण पळयतात. संवसारीक भलायकी संघटणेन 1998 वर्सा सावन पल्स पोलियोची मोहीम हातांत घेतली. जानेवारी आनी फेब्रुवारी म्हयन्यांतले आयतार पोलियो आयतार म्हूण मनयतात.
पोलियो आयतारा उपरांतच्या सप्तकांत 0 ते 5 पिराये गटांतल्या भुरग्यांक घरा कणकणीं वचून पालियोचो डोस पिवयतात. ते खातीर व्यापक प्रमाणाचेर लोकजागृताय करतात. संवसारीक भलायकी संघटणेच्या मार्गदर्शना खाला आमचे भलायकी यंत्रणेन भारतांतल्यान पोलियो मुक्ती खातीर खर यत्न केले. अमिताभ बच्चन, मोहम्मद कैफ बी मानेस्तांनी दूरचित्रवाणी वेल्यान लोकजागृताय केली. शासन, प्रशासन, भलायकी यंत्रणा हांच्या खर यत्नांतल्यान आयज भारत पोलियो मुक्त जाला.
27 मार्च 2011 ह्या दिसा संवसारीक भलायकी संघटणेन भारत पोलियो मुक्त जाल्ल्याची घोशणा केली. म्हणल्यार सवायशें कोटी लोकसंख्या आशिल्ल्या आमच्या देशाक पोलियो मुक्त करप ही दिसता तितली सोंपी गजाल नाशिल्ली. सुरवातेक जाल्यार पालक आपल्या भुरग्यांक पोलियो डोस दिवपाक तयारूच जायनाशिल्ले. आपल्या भुरग्यांक पोलियो डोस पियेवपाक दिवपाक निरुत्साही आशिल्ले. लोक घरांतल्यान भायरूच सरनाशिल्ले. पालकांचो निरुत्साह आसलो तरी भलायकी खात्यांतले कर्मचारी निरशेले नात. तांणी तांचें काम चालूच दवरलें. एखादें व्रत हातांत घेतिल्ले भशेन देशांतले भलायकी कर्मचारी पोलियो मुक्ती खातीर खर कश्ट घेताले. भलायकी कर्मचाऱ्यांच्या यत्नांक लागून रोखडेंच येस मेळ्ळें.
1999 वर्सा पोलियोच्या तीन विशाणूं मदीं दुसरो विशाणू नश्ट जालो, पूण पयल्या आनी तिसऱ्या प्रकारचो विशाणू अजून लेगीत कार्यरत आशिल्लो. उत्तर प्रदेश, मध्य प्रदेश, बिहार ह्या राज्यांत दुशीत उदकाक लागून जुलाब, ओंकारींचें प्रमाण अदीक आशिल्ल्यान थंय तोंडांतल्यान दिल्लें वासीन उपेगी थारनाशिल्लें. तेन्ना वैजकी संशोधकांनी मुरदाबाद ह्या गांवांत पोलियोचें एक गुणी वासीन म्हणल्यार 1, 2, 3 विशाणूंचें वासीन वेगळींवेगळीं दरेक जल्मल्ल्या भुरग्याक दिलीं. पूण देशांतल्या सगल्या भुरग्यां मेरेन अशी कार्यावळ पावोवप अशक्य आशिल्लें. उपरांत परतून तातूंत संशोधन केलें. सगल्यांक उपेगी अशा वासिनाची मात्रा तयार जाले उपरांत देशांत पोलियो मुक्तीची मोहीम गतीन राबयली. ताचो परिणाम म्हणल्यार आयज पोलियोमुक्त भारत देश अशी आमची वळख जाल्या.
भारत जरी पोलियो मुक्त जाल्लो आसलो तरी संवसारांतल्यान पोलियो अजून लेगीत मुळा सावन गेल्लो ना. आफ्रिका खंडांतल्या कांय देशांनी तशेंच आशिया खंडांतले पाकिस्तान, अफगाणिस्तान, सिरीया ह्या देशांतल्यान अजून लेगीत पोलियेचे दुयेंती सांपडटात. ह्या देशांतल्यान पोलियो रोखडोच सोंपतलो आनी संवसार रोखडोच पोलियो मुक्त जातलो अशी आस्त धरुया.
श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
