पांय : खूब म्हत्वाचो

भांगरभूंय | प्रतिनिधी

सदांच चुकनासतना मालीश केल्यार तळपांय, खोटांक कात्रे पडनात. बोटां मदीं घावे जायनात. कातीचें रोग जायनात. रातची शांत न्हीद पडटा.

आपले  कुडीच्या दरेका अवयवाची योग्य ती जतनाय प्रत्येकान घेवपाक जाय. तें खूब गरजेचें. पांय हो आमचे कुडीचो एक म्हत्वाचो भाग. कुडीचें पुराय वजें आमचे पांय दीसभर सांबाळटात. आमचें दीसभराचें काम, धांवपळ हें सगलें पांयांचेर अवलंबून आसता. पांयांक मात्शी चीर पडल्यार वा फोड आयल्यार सादीं कामां करपाक खूब त्रास जातात. कळो मारतात. पावसांत तर खूब समस्यांक तोंड दिवचें पडटा. थोड्याक पांयाक सुन्नपणा, थकवो जाणवता. मुयो येतात, खोटो फुट्टात. पांय सणसणटा, दुखता, वात येता, मागीर पांय जमनीक लागना. 

आमचे कुडींत कॅल्शियमाचो उणाव आसल्यार आमची पांयाची नाखटां धवीं पडटात. योग्य आहार, कड्डणा, पाचव्यो पालेभाजयो, दूद, ताक, दुदाचे हेर जीनस सदांच प्रमाणांत खावप बरें. पांयांचीं नाखटां हळडुवींच पडलीं तर तुमचे कुडींत हिमोग्लोबीन कमी आसा, अशें समजुचें. पांयांक भेगो पडल्यो जाल्यार हुस्को करपाचें कारण ना. हाचेर उपाय म्हणल्यार दिसाक चार लीटर उदक पिवप. तशेंच ऋतुमानान मेळपी त्या- त्या फळाचो रोस पियेवप. गुरवार बायलांच्या पांयांक भेगो पडटात, तर तांचे कुडींतलें कॅल्शियम, पोटेशियम, मॅग्नेशियम उणें आसता. संतुळीत आहार, पुश्टीक जेवण, दूद, नुस्तें खावप खरेंच बरें. 

पांयांच्या समस्यांचेर घरगुती उपाय आसा. खोबरेल तेल, तुपान मालीश करप, कात्रे पडल्यार वखदी काढ्यान शेकप, सोंसपा सारकें हून उदक बालदेंत ओतून तातूंत दोन लिंबू पिळप आनी वीस मिनटा पांय बुडोवन बसप. सदांच चुकनासतना मालीश केल्यार तळपांय, खोटांक कात्रे पडनात. बोटां मदीं घावे जायनात. कातीचें रोग जायनात. रातची शांत न्हीद पडटा. दोळ्यांची चमक वाडटा. जीं बायलां काॅम्प्युटराचो, मोबायलाचो चड वापर करतात, जाची मासीक पाळी बेगीन बंद जाता तांणी पांयांच्या तळव्याक मालीश करप बरें. ताका लागून पांय दुखप, मुयो येवप बंद जाता. सदांच माथ्याकूय खोबरेल तेल घालपाक जाय. 

पांयांची जतनाय घेवप म्हणजे आपले कुडीची राखण करप. सकाळीं वेळ ना जाल्यार सांजवेळार मेकळे हवेंत हलकोसो व्यायाम करप. पांय सामके हलके फुलके,सुटसुटीत जातात हें मतींत दवरचें. घरांत जांव भायर सरतना पांयांत जोतीं घालप गरजेचें. पांय हो म्हत्वाची अवयव हें कोणे विसरचें न्हय. 

– सिद्धी तिळवे