भांगरभूंय | प्रतिनिधी
शिश्यवृत्ती येवजणेची उत्पन्न मर्यादेंत वाडपणजीः शिक्षण खात्याचे संत सोहिरोबानाथ अांबिये शिश्यवृत्ती येवजणेंत बदल केल्या. नव्या येवजणेचो लाव घेवपा खातीर पालकांची येणावळ मर्यादा वर्साक तीन लाख रुपया वयल्यान पांच लाख रुपया मेरेन वाडयल्या. हाका लागून उच्च आनी तंत्रीक शिक्षण घेवपी विद्यार्थ्यां खातीर शुल्काचो भार उणो जातलो. ही येवजण राज्य शिक्षण उदरगत म्हामंडळ चालीक लायतली. शिक्षण खात्यान हालींच हे विशीं अधिसुचोवणी जारी केल्या.
हे येवजणे खाला पदवी, पदविका वा पदवी उपरांतच्या विद्यार्थ्यांक वर्साक चडांत चड 40 हजार रुपया मंजूर केल्यात. हाचे खातीर अभ्यासक्रम चडांत चड 5 वर्सांचो आसपाक जाय. विद्यार्थ्यान 10वी, 12वी वा गोंय राज्यांतल्या मान्यताय प्राप्त संस्थेंतल्यान पदवी मेळयिल्ली आसूंक जाय. येवजणे खातीर पात्र थारपा खातीर विद्यार्थ्याक शंबर टक्के वर्ग हाजेरी आसपाक जाय. येवजणेंत पात्र आसल्यार ही रक्कम थेट विद्यार्थ्याच्या बँक खात्यांत जमा जातली.
पोरूं 60 हजारां परस चड शुल्क आशिल्ल्या अभ्यासक्रमांक येवजणेचो अर्थीक आदार दिवंक नाशिल्लो. पूण ही अट नव्या येवजणेंतल्यान काडून उडयल्या. ही येवजण चालीक लावपा खातीर अर्थसंकल्पांत दिल्ले प्रमाण शिक्षण उदरगत म्हामंडळ खाशेलो निधी तयार करतले. ह्या निधीक व्यक्तीं कडल्यान वा वेवसायांतल्यान देणगी घेवपाक मेळटा. येवजणेचो लाव घेवपा खातीर म्हामंडळाच्या संकेतथळार ऑनलायन अर्ज करचो पडटलो.
हाचे भायर खाजगी म्हाविद्यालयांतल्या अभियांत्रिकी सारक्या अभ्यासक्रमां खातीर भुरग्यांक शुल्काचो भार पडचो न्हय हे खातीर खात्यान 2021 वर्सा ‘डीजे गिफ्ट’ येवजण सुरू केल्ली. हाचे प्रमाण विद्यार्थ्यांक म्हाविद्यालयाच्या वट्ट शुल्कांतल्यान कांय मुळावे शुल्क भरचें पडटा. उरिल्लें शुल्क राज्य सरकार भरता. हे येवजणेची येणावळ मर्यादा 5 लाखां वयल्यान 12 लाख रुपया मेरेन वाडयल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
