भांगरभूंय | प्रतिनिधी
भारत आनी न्युझिलॅण्ड पंगडां मदीं सुरू जाल्ले दुसरे टॅस्टीच्या पयल्या दिसा वॉशिंग्टन सुंदरान उत्कृश्ट बॉलींग करून 7 विकेटी घेतल्यो. ताच्या ह्या जबरदस्त प्रदर्शना नेटार न्युझिलॅण्डाचो पयलो डाव 259 धांवड्यांचेर आडावपाक येजमान भारताक येस आयलें. मोखीचो फाटलाव करपी भारताची सुरवात बरी जाली ना. मुखेली रोहीत शर्मा रोखडोच बाद जालो. पयल्या दिसाचो खेळ सोंपलो त्या वेळार भारतान आपल्या पयल्या डावांत 1 विकेट व्हगडावन 16 धांवड्यो केल्ल्यो.
पयल्या दिसा वट्ट 11 विकेटी पडल्यो. तातूंतल्यो 10 विकेटी ऑफ स्पिनरान आनी एक विकेट दावखुऱ्या स्पिनरान घेतली. आनीक एक तथ्य म्हणल्यार सगल्यो विकेटी एकेच वटेनच्यान पडल्यो. सगल्यो विकेटी ऑफ स्पिनरांनी घेवपाची भारताचे टॅस्ट इतिहासांतली ही पयलीच घडणूक.
पुणेची खेळपट्टी स्पिनरांक मजत करपी थारतली हें बंगळुरू टॅस्टी उपरांत स्पश्ट जाल्लें.
चवथ्या डावांत बॅटींग करप कठीण जातलें हें आशिल्ल्यान न्युझिलॅण्डाचो मुखेली टॉम लॅथमान टॉस जिखना फुडें पयलीं बॅटींग करपाचो निर्णय घेतलो. टॉस हारल्या उपरांत भारताचो मुखेली रोहीत शर्माच्या मुखामळाचेर हुस्को स्पश्ट दिसतालो. हे मॅचींत टॉस म्हत्वाचो आसा हें ताका खबर आशिल्लें.
न्युझिलॅण्डाची सुरवात बरी जाली ना. मुखेली लॅथम आठवे ओव्हरींत आर आश्विनाचो शिकार थारलो. ते उपरांत विल यंग आनी डॅव्हन कॉन्वे हांणी दुसरे विकेटी खातीर 54 धांवड्यांची भागिदारी केली. दोगांयनी सकारात्मक रितीन खेळपाचो यत्न केलो.
जेवणाच्या विसवा मेरेन न्युझिलॅण्डान फकत दोनूच विकेटी व्हगडायिल्ल्यो. रचिन रवींद्र भारताक परतून नाकापुरो करपाक शकता अशें दिशिल्लें. कॉन्वेन ताका बरी साथ दिली.
दोगांयनी बरे तरेन आपलो डाव मुखार व्हेलो आनी अर्द शेंकडे लेगीत पुर्ण केले. कॉन्वे (76) आश्विनाचो शिकार थारलो. अशे तरेन सुरवातीच्यो तिनूय विकेटी ताणेंच घेतल्यो. ते उपरांत जे वटेच्यान आश्विन बॉलींग करतालो, थंयच्यान बॉलींग घालपाची जापसालदारकी वॉशिंग्टनाक दिली. वॉशिंग्टनान ताचो योग्य फायदो करून घेतलो. च्या चो विसव येता म्हणसर खेळपट्टीन आपलो रंग बदलपाक सुरवात केली. बॅट्समनांक शॉर्ट खेळपाक कठीण जावपाक लागलें.
आपली बॉलींग खेळपाक तितकें सोंपें जावचें ना हें वॉशिंग्टनान च्या च्या विसवा पयलीं स्पश्ट केलें. 60वे ओव्हरींत ताणें रवींद्राक बोल्ड केलो. ताणें आपलें खातें उगडलें. ते उपरांत 62वे ओव्हरींत टॉम ब्लंडलाक बोल्ड केलो. हो न्युझिलॅण्डा खातीर खर धपको आशिल्लो.
रवींद्र आनी कॉन्वे बाद जाल्या उपरांत न्युझिलॅण्डाच्या एकाय बॅट्समनाक चड वगत खेळपट्टीचेर तग धरपाक जमलो ना. च्या च्या विसवा उपरांत लेगीत वॉशिंग्टनान आपली जबरदस्त बॉलींग कायम दवरली. ताणें 8.1 ओव्हरींनी 25 धांवड्यो दिवन 5 विकेटी घेतल्यो. मार्च 2021 उपरांत भारताच्या टॅस्ट पंगडांत पुनरागमन करपी वॉशिंग्टनान न्युझिलॅण्डाचो डाव 259चेर आडायलो.
खेळपट्टी स्पिनरांक मजत करपी आशिल्ल्यान भारताक लेगीत ताचो फटको बसपाक शकता हें स्पश्ट जाल्लें. भारतान पयल्या दिसा 11 ओव्हरींक तोंड दिलें. हातूंतल्यान 16 धांवड्यो आयल्यो आनी रोहीताच्या रुपान एक धपको लेगीत बसलो. ताका टिम सावथीन बाद केलो. काल फास्ट बॉलरान घेतिल्ली ती पयली विकेट आशिल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
