भांगरभूंय | प्रतिनिधी
पणजीः गोंयचे सरकारी कर्मचारी, बँक आनी उद्देगीक कर्माचार्यांक २०२५ वर्सा खातीरच्यो सुटयो जाहीर जाल्यात. अंदूं १८ भौशीक सुटयो आसात. तातूंत तीन आयतार आनी एक शेनवार आयिल्ल्यान सरकारी कर्मचार्यांच्यो चार सुटयो गेल्यात. मात, अठरा दिसां मदले चार शुक्रार आनी तीन सोमार सुटयेचे आयल्यात. तातूंत विशेश दोन सुटयो आसात. जातूंत एक सुटी शुक्रारा आयल्या. म्हळ्यार बारा खेपो चडश्या सरकारी कर्मचार्यांक सेगीत तीन दीस सुटयेचे मेळटले. म्हळ्यार वर्सांतले ३६ दीस सुटयेचे थारतले.
सरकारान २३ प्रतिबंधीत सुटयो (आरएच) अधिसूचीत केल्यात. हातूंत कंपनीचे कर्मचारी सुटी घेवपाची काय ना हें आपूण थारावपाक शकतात. त्या सुटयां मदीं तीन आयतार आसात.
८ उद्देगीक सुटयो जाहीर केल्यात जातूंत एक आयतार आसा. दोन सुटयो सोमारा आयल्यात.
बँकांक आशिल्ल्या १८ सुटयां मदीं २ आयतार, ३ सोमार आनी ४ शुक्रार आसात. आयतारच्यो दोन सुटयो शुक्रार आनी सोमार आयिल्ल्यान बँक कर्मचार्यांनी २०२५ त सात फावटीं सेगीत दोन वा तीन दीस सुटी मेळपाक शकता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
