भांगरभूंय | प्रतिनिधी
आग्रा, खबरां संस्था: आग्रा एका दुयेंतीक दोतोरांनी फटयिल्ल्याची घडणूक मुखार आयल्या. बारीक खोकली येवपी दुयेंतीक दोतोरान कॅन्सर आशिल्ल्याचें बंडल मारलें. ऑपरेशन जावंक ना जाल्यार दुयेंती चार- पांच दिसूच जगतलो, अशीय सुरय फटास मारली. इतलेंच न्हय तांणी बोगस अहवाल तयार करून दिलो. त्या दुयेंतीन मुंबय आनी नोएडा तपासणी केली तेन्ना त्या दोतोरांक कांयच मेळूंक ना. उपरांत दुयेंतीन पुलिशेंत कागाळ केली. पुलिसांनी बोगस अहवाल करपी दोतोराचेर कागाळ नोंद केल्या.
अछनेरा रावपी राजकुमार (४८) हांणी सांगलें की, १७ जानेवारी २०१३ दिसा ताका खोंकली येता म्हूण एसएन मॅडिकल कॉलेजीचे डॉ. टीपी सिंह हांणी तांच्या घरा तपासलो. उपरांत तपासण्यो करपाक सांगलें आनी वखदां बरोवन दिलीं. तपासणे उपरांत राजकुमार घरा गेले तेन्ना तांकां रगताची ओंकारी जाली. मागीर डाॅ. सिंग हांणी तांकां फुफ्फूस तपासणे खातीन डॉ. मुकेश शर्मा हांचे कडेन धाडलो. डॉ. शर्मा हांणी अग्रवाल क्रिटिकल केअर सेंटर, शांती मधुवन प्लाझा हांगा तपासणी केली. न्यू आग्रा क्लिनिकल पॅथॉलॉजी लॅबा वतीन तपासणी अहवाल मेळ्ळो.
अहवाल पळयले उपरांत डॉ. शर्मा हांणी फुफ्फुसाचो कॅन्सर जाल्ल्याचें दुयेंतीक सांगलें. बेगीनूच उपचार करूंक ना जाल्यार ते तीन-चार दिसांचेच सोयरे आसा, अशें सांगलें. हाका लागून दुयेंती भियेलो. पिडेस्तान हेर दोतोरांचो सल्लो घेवपाचें थारायलें. पुरुषोत्तम दास सावित्री देवी कॅन्सर आनी संशोधन केंद्र हॉस्पिटलांत डॉ. संदीप अग्रवाल हांणी तपासणी करून तांकां कॅन्सर जाल्ल्याचें सांगलें. उपरांत डॉ. शर्माक ऑपरेशना खातीर ८ लाख रुपया खर्च येतलो अशें सांगलें.
पिडेस्ताच्या म्हणण्या प्रमाण, ताचे कडेन उपचारा खातीर पयशे नाशिल्ले. राजकुमार हांणी एम्सांत वचपाचें थारायलें. थंय अपोयंटमेंट मेळूंक नाशिल्ल्यान ते १३ फेब्रुवारी २०२३ दिसा टाटा मेमोरियल कॅन्सर हॉस्पिटलांत पावले. थंय ते १० दीस एडमिट आशिल्ले. तपासणी अहवाल आयले उपरांत थंयच्या दोतोरांनी तांकां कॅन्सर नाशिल्ल्याचें सांगलें. टाटा मेमोरियलच्या दोतोरांनी आदलो अहवाल पळयले उपरांत आग्राच्या लॅबांतल्यान नमुने घेवन येयात, अशें सांगलें. राजकुमार हांणी आग्रा प्रयोगशाळे कडेन संपर्क सादलो तेन्ना तांणी आमचे कडेन आतां कसलोच नमुनो ना, अशें सांगून हात वयर केले.
नोएडांत परत तपासणी
पिडेस्ताच्या मनांत दुबाव आशिल्ल्यान म्हयन्या उपरांत तांणी नोएडांतल्या मेदांता हॉस्पिटलांत व्हरून आपले रिपोर्टस् डॉ. रणदीप गुलौरिया हांकां दाखयले. तांणी परत तपासणी केली. मात अहवालांत कॅन्सर दिसूंक ना.
कटकारस्थानाचो आरोप
आग्राचे डॉ. टी. पी. सिंग, डॉ. मुकेश शर्मा, कॅन्सर तज्ञ डॉ. संदीप अग्रवाल, क्लिनीकल पॅथॉलॉजीचे डॉ. अर्पित अग्रवाल आनी डॉ. अनिल अग्रवाल हांणी कारस्थानाचोच एक भाग म्हणून कॅन्सर आशिल्ल्याचो फटींग अहवाल दिल्ल्याचो आरोप पिडेस्त राजकुमार हांणी केला. उपचाराच्या नांवान आठ लाख रुपयांची तोपी घालपाच्या हेतान हें सगळें केलां. तांच्या बोगस अहवालाक लागून पिडेस्ताच्या पुराय कुटूंबाचो मानसीक, शारिरीक आनी अर्थीक छळ जालो.
पुलिसांनी हे विशीं ह्या सगल्या दोतोरां आड गुन्यांव नोंद केला. पुलीस फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
