भांगरभूंय | प्रतिनिधी
मडगांवः दोन दिसां आदीं मुख्यमंत्री डॉ. प्रमोद सावंत हांणी सगळी भरती कर्मचारी निवड आयोगा वरवीं जातली, अशें परतून एकदां सांगलें. सरकारी नोकऱ्यो गुणवत्तेचेर दितात, हाचेर भर दिल्लो, मात मडगांव नगरपालिकेन 11 एलडीसींची थेट भरतीची जायरात काडली. तातूंत पारदर्शकताय येवचे खातीर आयोगा वरवीं भरती प्रक्रिया जावची, अशी मागणी युवा फुडारी प्रभव नायक हांणी केल्या.
मडगांव नगरपालिके कडल्यान 11 एलडीसी आनी हेरांचे भरती खातीर जारी केल्ले जायरातीचेर मत उक्तायतना भरती प्रक्रियेंत पारदर्शकताय येवपाची मागणी केली. मुख्यमंत्र्यां कडल्यान परतून परतून सगळ्यो नोकर भरती प्रक्रिया ह्यो फक्त कर्मचारी भरती आयोगाच्या माध्यमांतल्यान जातल्यो अशें सांगतात. मडगांव नगरपालिकेंतलीं एलडीसी पदां कर्मचारी निवड आयोगा वतीन कित्याक भरिनात, हाची जाप गोंय सरकारान मडगांवच्या लोकांक दिवची. सुशिक्षीत तरणाट्यांक गुणवत्तेचेर नोकऱ्यो मेळपाक जाय, अशें प्रभव नायक हांणी सांगलें. मजगतीं, मडगांवचो आके वाठार हो सदांच शांतताप्रीय आशिल्लो. गोंयांतली कायदो आनी सुवेवस्था इबाडल्या. गुन्यांवकार मेकळेपणान वावुरतात, हें बुधवारा बंदुकेचो धाक दाखोवपाचे घडणुकेन उक्तें जालां. पुलिसांनी तत्काळ कारवाय करून सगळ्या गुन्यांवकारांक कादयेंत उडोवचें, अशें प्रभाव नायक हांणी सांगलें.
कोंकणी सक्तीची कित्याक ना?: सावियो
मडगांव पालिकेचे जायरातींत कोंकणी गरजेची आसा, अशें नमूद करूंक नाशिल्ल्यान शॅडो कावंसिलाचे निमंत्रक आनी काँग्रेस फुडारी सावियो कुतिन्हो हांणी हरकत घेतल्या. मडगांव पालिके कडल्यान जारी केल्ले जायरातींत पर्यवेक्षकांच्या पदां खातीर कोंकणीचें गिन्यान गरजेचें नाशिल्ल्याचें दिसता. ते खातीर मडगांव नगरपालिकेन हे विशीं स्पश्टीकरण दिवप गरजेचें आसा, अशें मत सावियो हांणी उक्तायलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
