भांगरभूंय | प्रतिनिधी
मांडवी, जुवारी न्हंयेंत रेंव काडपाक ईआयएएची मान्यताय
भांगरभूंय । प्रतिनिधी
पणजी : मांडवी आनी जुवारी न्हंयेंत रेंव काडपाक पर्यावरणी प्रभाव मुल्यांकन प्राधिकरणान (ईआयएए) मान्यताय दिल्या. हे खातीर रेंव काडपाचे परवाने दिवपाचो मार्ग उक्तो जाला. अर्ज घेवन पर्यावरणी दाखले मेळ्ळ्या उपरांत रेंव काडपाक सुरवात जातली. डिसेंबरांत रेंव काडपाक सुरवात जातली, अशी म्हायती खण खात्याचे संचालक नारायण गाड हांणी दिली.
खण खात्यान परवान्या खातीर इत्सुकां कडल्यान अर्ज मागयल्यात. अर्ज करपा खातीर एका म्हयन्याची मुजत आसा. अर्ज खण खात्या कडेन ऑनलायन पद्दतीन करचे पडटले. अर्ज आयले उपरांत तांची तपासणी जातली. खण खातेंच अर्जदारा वरवीं पर्यावरणी दाखल्या खातीर अर्ज करतलें. पर्यावरणी दाखलो मेळ्ळे उपरांत परवाने दिवप सुरू जातले. डिसेंबर सावन मॅनुएल पद्दतीन रेंव काडपाक सुरवात जातली, अशें खण संचालक नारायण गाड हांणी सांगलें.
मांडवी आनी जुवारी न्हंयेंत रेंव काडपा खातीर 12 वाठार निश्चीत जाल्यात. रेंव काडपा खातीर 100 जाणांक परवाने मेळप शक्य आसा. अर्ज आयले उपरांत तपासणी जातली. अटींक पालव दिवपी वेवसायिकांक परवाने मेळटले, अशें खण संचालकांनी सांगलें.
रेंव परंपरीक पद्दतीनूच काडची पडटली. यांत्रीक पद्दतीन रेंव काडपा वयली बंदी कायम आसा.
फाटलीं कांय वर्सां रेंव काडपाचेर बंदी आशिल्ल्यान गोंयांत रेंवेचो उणाव जाता. गोंयांत व्हड प्रमाणांत बांदकामां चालू आसात. बांदकामां खातीर भायल्यान रेंव हाडची पडटा. ही रेंव येरादारी खर्चाक लागून म्हारग पडटा. रेंव काडपा खातीर परवाने दिवपाची प्रक्रिया बेगीन सुरू करची, अशी मागणी बांदकाम वेवसायिकां कडल्यान जाताली. तशेंच परंपरीक रेंव काडपाच्या वेवसायांत खूबशे गोंयकार आसात. वेवसाय ठप्प आशिल्यान तांच्या रोजगाराचो प्रस्न निर्माण जाला. रेंवेचो प्रस्न सुटावो जावपा खातीर कांय म्हयन्यां पयलीं मुख्यमंत्री डॉ. प्रमोद सावंत हांणी पर्यावरण मंत्री आलेक्स सिक्वेरा हांचे सयत केंद्रीय पर्यावरण मंत्री भूपेंद्र यादव हांची भेट घेतिल्ली.
एनजीटी कडल्यान यचिका निकालात
बेकायदा रेंव काडपा संबंदांत उच्च न्यायालयांत याचिका आशिल्ल्यान हरीत लवादान घेतिल्ली स्वेच्छा याचिका निकालात काडल्या. हरीत लवादाचे न्यायालयीन वांगडी दिनेशकुमार सिंग आनी तज्ञ वांगडी डॉ. विजय कुलकर्णी हांणी याचिका निकालात काडल्या. बेकायदा रेंव काडपाचेर नदर दवरपा खातीर सरकारान घोळटे पंगड स्थापन केल्यात. तशेंच बेकायदा रेंव काडटात तांचेर गुन्यांव नोंद जाल्यात. उच्च न्यायालयांत याचिकेचेर सुनावणी चालू आशिल्ल्यान स्वेच्छा याचिका निकालात काडपाचो आदेश हरीत लवादान दिला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
