भांगरभूंय | प्रतिनिधी
पणजी ः फोंतेन्हाज वाठारांत पर्यटक आनी थळाव्या लोकां मदीं वाद निर्माण जाल्ल्यान फुडल्या सप्तकांत खाशेली बसका जातली. पुलीस, येरादारी, पर्यटन, जिल्होधिकारी कार्यालय, महापालिका अधिकारी आनी थळावे लोक हाजीर आसतले अशी म्हायती महापौर रोहित मोन्सेरात हांणी दिली. थळाव्या लोकां कडल्यान मेळिल्ल्या सुचोवण्यांचेर विचार करून ताची अंमलबजावणी करतले अशें तांणी सांगलें.
सेंट टोमे रावपी लोकांनी बुधवारा महापौर मोन्सेरात हांकां मेळून आपल्यो समस्या मांडल्यो. हाचे उपरांत मोन्सेरात हांणी प्रसार माध्यमां कडेन संवाद सादलो. ह्या वाठारांत पर्यटक खूब येतात. सकाळीं 6 ते रातचें उसरां मेरेन थंय गर्दी आसता. पर्यटक मजा-मस्ती करतात. केन्ना केन्ना सरळ घरांत भितर सरून व्हिडियो काडटात अशें लोकांनी सांगिल्लेंस अशें तांणी सांगलें.
सोशल मिडियाक लागून हो वाठार फामाद जाला. रेस्टॉरंट आनी हॉटेलांक लागून हो वाठार कांय प्रमाणांत वेवसायीक जाला. देखूनच हांगा पर्यटकांचो आंकडो वाडला. पर्यटनाक प्रोत्साहन दिवपाक जाय. पूण पर्यटकांनीय योग्य रितीन वागपाची गरज आसा. त्रास दिवपी पर्यटकां खातीर पुलीस तैनात करप गरजेचें आसा. हांगा पर्यटकांच्या आंकड्याचेर नियंत्रण दवरपाक जाय अशें थळावे लोक सांगतात, अशी म्हायती मोन्सेरात हांणी दिली.
अंदूं फेस्टिवल ना
थळाव्या लोकांनी अंदूं फेस्त दो पोवो करचे नात अशें थारायलां. लोकांक नाका जाल्यार आमी ह्या वाठारांत हो महोत्सव घडोवन हाडचे नात अशें महापौर मोन्सेरात हांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
